Gaur hasi da Iberiako greba, eta ia 50 hegaldi geratu dira bertan behera euskal aireportuetan. Iberiaren arabera, “garai hauetan izan ohi den normaltasunarekin” egiten ari dira greba. Bestalde, CCOOk adierazi du bi ordurainoko atzerapenak eragin dituela Loiuko aireportuan.

Carrefourrek ez ditu Pepsico konpainiaren produktuak salduko, “prezioen gehiegizko igoera dela eta”. Aurrerantzean, ezin izango dira erosi Pepsi, 7up, Lipton, Lay’s, Benenuts, Doritos eta Alvalle enpresaren produktuak supermerkatu horretan.

Etenak ez du ezer eten. Athletic bikain ari zen 2023aren bigarren erdian, eta bikain ekin dio 2024ari ere. 0-2 irabazi dio gaur Sevillari Sanchez Pizjuanen, Espainiako Lehen Mailako aurreneko itzuliko azken partidan. Sevillan (Espainia) irabazita, bolada ederrari eusten dio: bederatzi jardunaldi daramatza galdu gabe ligan, eta jokoan egon diren azken 27 puntuetatik 21 lortu ditu. 38 punturekin amaitu ditu lan erdiak. Duela 40 urte ez zituen horrenbeste puntu lortu lehen hemeretzi neurketetan. Horri esker, Txapeldunen Ligako postuetan dago: laugarren. Ernesto Valverdek 500. partida egin du gaur entrenatzaile gisa Espainiako Ligan, eta bere jokalariek opari ederra egin diote: neurketa bikaina jokatu dute. Hasi eta buka nagusitu dira, eta aukerarik ez diote eman Sevillari. Quique Sanchez Floresek lehen aldiz zuzendu du Espainiako taldea bere zaleen aurrean, baina alferrik, ez da susperraldirik egon. Itxura txarra du. Zaleek txistu egin diote partida amaieran. Athleticek, ordea, itxura ederra du. Lehen jokalditik gailendu da, eta berehala hasi da arriskua sortzen. Gorka Guruzetak lehen aukera izan du 23. minutuan, baina ez du asmatu. Askoz garbiagoa izan da minutu bat geroago Nico Williamsek huts egin duena. Jokaldi polita egin du Alex Berenguerrekin, baina oso gutxigatik bota du kanpora baloia. Hirugarren ahalegina izan da balekoa. 30. minutuan, Iñigo Ruiz de Galarretak erdiraketa neurtua egin du eskuinetik, eta Mikel Vesgak gol bikaina sartu du, buruz. Bisitariek merezi zuten gola, oso nagusi baitziren. Atsedenaldiak ez du partidaren joera aldatu. Hala, bigarren zatia hasi eta berehala, Athleticek oso gertu izan du bigarren gola sartzea eta neurketa erabakita uztea. Hiru abagune argi izan ditu jokaldi berean; Nico Williamsek izan du argiena, baina haren jaurtiketa bortitzak langa jo du. Pixkanaka, Sevilla gai izan da Athleticen presioari izkin egiteko, eta lehen aldiz hasi da arriskuarekin iristen Unai Simonen arearen ingurura. Lehenbizi, Yuri Berchichek aurpegiarekin urrundu du Sergio Ramosek area ertzetik botatako falta arriskutsua; gero, Susok gutxigatik bidali du kanpora baloia area kanpotik; eta ondoren, Unai Simonek bi geldiketa ikusgarri egin ditu jokaldi berean. Hala ere, epaileak jokoz kanpo adierazi du. Baina gehien sufritzen ari zenean, partida erabakita utzi du Athleticek. Ander Herrerak baloia erdiratu du eskuinetik, Sevillako atzelariek huts egin dute, eta baloia Aitor Paredesi iritsi zaio area txikian. Atzelariak ez du huts egin, eta gola sartu du; aurrenekoa du lehen taldearekin. 76. minutua zen. Bisitariek esku-eskura zuten garaipena. Eta hala izan da azkenean. Zalantza zegoen ea nola eragingo zion taldearen jokoari Iñaki Williamsen hutsuneak, baina gaur inor gutxi gogoratu da harekin. Hori ere albiste bikaina da. Garaipenak, gainera, are eta indar eta konfiantza handiagoa emango dio Athletici datorrenari begira. Aurki du hurrengo partida: igandean, Ipuruan, Eibarren aurka, Espainiako Kopako final-hamaseirenetan.

Oker zaharrak zuzenduz ekin dio urte berriari Osasunak. Golak erruz sartu dizkiote orain arte, eta etxean oso tantaka irabazi ditu partidak. Bada, gaur gailendu egin zaio Sadarren Almeriari; nola, eta atea hutsean utzita. Egiazki, zerikusia izan du horretan aurkariaren ezintasunak. Sailkapenean hondoa jota dago Almeria, eta erraztasun handiak eman dizkio Osasunari. Gorritxoak ez dira distiratsu aritu, baina beharrik ere ez dute izan Gaizka Garitanoren taldea mendean hartzeko. Budimirrek sartu du neurketako gol bakarra, lehen zatian. Goserik ez du izan Osasunak aldea handitzeko. Era berean, sufritu gabe eutsi dio markagailuari. Eginbeharrak egin ditu, besterik ez. Irabazi beharreko partida zen Nafarroako taldearentzat: batetik, Mallorcan oso irudi kezkagarria eman zuelako; bestetik, jaitsiera postuak hurbilago zekuskielako; eta batez ere, aurrean ligako talderik ahulena zuelako. Almeriak are premia larriagoa zuen, eta bi taldeek bizi ekin diote neurketari. Kanpokoek eraso azkarrak baliatu dituzte Osasunaren areara hurbiltzeko, eta hasi orduko aukera ona izan dute, Sergio Herrerak pasean kale egin ondoren. Berehala iritsi da etxekoen arrapostua, Chimy Avilaren bitartez: erremate akrobatikoa egin du area barruan, eta langa gainetik igaro da. Hortik gutxira zelaia utzi behar izan du argentinarrak, min hartuta. Hogeigarren minutua beteta, aukerak kateatzen hasi da Osasuna. Catena aurrelariz mozorrotu da, eta birritan izan da lehen gola sartzear. Aurkariaren area, ordea, Budimirren eremua da. Jokaldi nahasi baten ondotik, kroaziarra bakarrik gelditu da ate aurrean. Begirada bat aski izan zaio baloia non ipini nahi zuen erabakitzeko. Non begia, han jaurtiketa. 28. minutua zen, eta merezitako saria jaso dute gorritxoek. Ez ziren jokoa askorik lantzen ari, baina nahiko erraz sortu dute arriskua. Golak patxada eman die; Almeria, ordea, etsiak jota gelditu da. Ez du altxatzeko ia imintziorik ere egin. Arnaizek gertu izan du 2-0koa atsedenaren aurretik. Neurketaren bukaeran ere beste aukera on bat izan du, baina ezin izan du baloia zutoin artera bideratu. Osasunak ez du abagune gehiagorik izan markagailuko aldea handitzeko. Erritmoa moteldu diote partidari, eta ontzat eman dute emaitza. Apustu arriskutsua izan da; Almeriaren bat-bateko oldarraldi batek garaipenik gabe utzi zitzakeen. Alabaina, Garitanorenak ez dira ia saiatu ere egin; erdiraketa bakanen bat, eta gutxi gehiago. Hala, garaipen eroso bezain murritza lortu dute gorritxoek. 22 punturekin finitu dute lehen itzulia. Orain, gogoz dira Kopari eta Superkopari heltzeko.

Loiuko aireportuko 18 hegaldi, Hondarribiko 16 eta Noaingo 14 desprogramatu ditu konpainiak. Alabaina, Iberia taldeak lurreko asistentzia ematen die beste konpainia batzuei eta horietan ere egina izan dezake lanuzteak.

Iberiako handling zerbitzuaren greba ostiral honetan hasiko da, negoziazioek porrot egin ostean

Esnea, arrautzak eta haragia dira erosketa-saskian gehien garestitu diren elikagaiak. Elikagaien kontsumoko prezioen indizea % 18 eta % 50 artean igo zen Euskadin 2021eko urtarriletik 2023ko abuztura bitartean, baina Lehiaren Euskal Agintaritzak ez du “lehiaren kontrako jokaerarik” atzeman.

Javier Milei Argentinako presidente berriaren motozerrak lehen enbor gogorrarekin egin du topo. 2023ko abenduaren 20an onartu zuen Mileik Beharraren eta Larrialdiaren Dekretua (70/2023), hirurehun neurri baino gehiago bilduta. Garrantzitsuenetako bat lan erreforma izan zen: lege berriak greba eskubidea mugatzen du, langileen probaldia luzatu, eta kalte ordainak murriztu. Bada, Argentinako Lanaren Apelazioen Ganberak behin-behinean atzera bota du Mileiren erreforma, CGT Lanaren Konfederazio Orokorra sindikatuaren salaketari esker. Abenduaren 20an iragarri zuen Mileik neurria, telebistan, eta handik bederatzi egunera sartu zen indarrean, abenduaren 29an. Astebete baino gutxiago egin du beraz lan erreformak, Andrea Garcia Vior eta Alejandro Suadera epaileek atzera bota baitute Mileik onartutakoa. Hala ere, epaia behin-behinekoa da, eta dekretua indarrean egongo da behin betiko ebazpen bat egin arte. Lan erreforma eta dekretua Mileiren kanpaina presidentzialak aldaketa ekonomiko sakonak izan zituen ardatz, eta motozerra bat erabili zuen zer egingo zuen irudikatzeko. Boterea hartu bezain laster, martxan jarri zuen: sektore publikoan murrizketak egin, ministerioak gutxitu, enpresa publikoak pribatizatu, eta babes sozialerako hainbat lege bertan behera utzi ditu. Horietako asko abenduaren 20an aurkeztutako 70/2023 dekretuan egin zituen. Dekretuaren laugarren tituluak egiten dio erreferentzia lan erreformari. Lan epaiketetan aldaketak egin nahi zituen Mileik, kontratuen hasierako probaldiak luzatu, haurdunaldi baimenak murriztu eta kotizazioak gutxitu. CGT herrialdeko sindikatu nagusia da, eta lan erreformaren eta 70/2023 dekretuaren aurka mobilizatu zen Mileik iragarri bezain laster. La Rioja probintziako gobernadoreak ere Justizia Gorte Gorenari eskatu zion erreforma konstituzioaren aurkakotzat jotzeko. Zuzenbide publikoko hainbat adituk ere gogor kritikatu dituzte Mileiren neurriak, Argentinako 1853ko Konstituzioaren aurkakoak direlakoan. Daniel Sabsay, Felix Lonigro eta Vilma Ibarra dira neurrien aurka agertu diren konstituzionalistetako batzuk. Hainbat mobilizazio jendetsu egin dira Mileiren aurka hark boterea hartu zuenetik, eta horietako hainbatetan kaleak moztu dituzte manifestariek. Giza Kapitaleko ministroak, Sandra Petovellok, mehatxu egin zien manifestariei, esanez errepideak mozten dituenak ez duela langabezia kobratuko.

EH Bildurekin eginiko akordio bat tarteko, Espainiako Gobernuak 600.000 euroko funts bat onartu zuen 2023ko aurrekontuetan, Gasteizko Zaramaga auzoko San Frantzisko eliza Martxoaren 3ko Biktimen Oroimenezko Zentro bilakatzeko. Orain, baina, Eusko Jaurlaritzako Justizia, Berdintasun eta Gizarte Politiketako sailburu Nerea Melgosak azaldu du funts hori ezingo dutela erabili eliza eraberritzeko, argudiatuta Eusko Jaurlaritza, diru funtsa jaso beharko lukeen erakundea, ez dela eraikinaren jabea edo onuraduna. EH Bilduko legebiltzarkide Julen Arzuaga mintzatu zaio Melgosari, eta memoria zentroa kudeatzeko eratu beharreko fundazioaren nondik norakoez eta Espainiako Gobernuaren diru funtsaren exekuzioaz galdetu dio. Izan ere, azaldu du 600.000 euroko funtsa «galtzeko» arriskua dagoela proiektuari ekiten ez bazaio. Galderari erantzunez, Melgosak azaldu du Jaurlaritza ez dela elizaren jabe eta ez dela izango etorkizunean ere, haren lagapena memoria gunearen ardura hartuko duen fundazioaren esku geratuko delakoan, «behin hura eratzen denean». Fundazio hori datozen asteetan eratuko da, sailburuaren hitzetan; izan ere, gaineratu du haren parte izango diren erakundeen arteko negoziazioak «aurreratuta» doazela. Zehazki, Eusko Jaurlaritza, Arabako Foru Aldundia, Gasteizko Udala, Gasteizko elizbarrutia, eta Martxoak 3 eta Memoria Gara elkarteek osatuko dute. Melgosak azaldu du eliza uzteko prozesua martxan dela, baina ezingo dutela erabili 600.000 euroko funtsa, ez direlako eraikinaren jabeak. Argudiatu du behin fundazioa eratuta elizbarrutiak hari egingo diola lagapena, eta ez Eusko Jaurlaritzari; EH Bilduren eta Espainiako Gobernuaren akordioaren arabera, funtsa kudeatu beharko lukeenari. Era berean, udal eta foru hauteskundeak erabili ditu lanak atzeratzeko arrazoi gisa: «Zentzuduna zirudien aldundia eta udala ordezkatuko dituzten kideak maiatzeko hauteskundeetatik ateratako gobernuek izendatzea». Arzuagak, baina, X sare sozialean salatu du Elizak, Gasteizko Udalak eta Eusko Jaurlaritzak elkarri egozten diotela egin beharreko lanen ardura, hura eta hura zuzentzeko fundazioa osatzeko lan egin beharrean. Arzuagaren esanetan, San Frantzisko eliza memoria gune bihurtzeko ardura hiru erakunde horiena da, baina «pixkanaka erortzen» ari da, ez dutelako esku hartzen.