Bi asterako su etena ezarri ondoren, AEBak eta Iran aurrez aurre eseri ziren joan den larunbatean. Elkarrizketak, ordea, hutsean amaitu ziren, eta Ormuzko itsasartea ixteko agindua eman zuen atzo Donald Trump AEBetako presidenteak. Zehazki, helmuga edo irteera Irango portuetan duten ontziak blokeatzeko agindua eman du, eta gaur bertan sartu da indarrean, Euskal Herrian 16:00ak zirenean. Segidan, beste behin Trumpek mehatxu egin dio Teherani, eta ohartarazi berak ezarritako blokeoa geldiarazten saiatzen diren itsasontziak «desagerrarazi» egingo dituela. Erabakiak ezegonkortasuna eragin du mundu osoko merkatuetan, eta ezinegona munduko gobernu askotan. Agindua indarrean sartu eta 23 minutura, Irango itsas armada «itsasoaren hondoan» dagoela idatzi du Trumpek, Truth Social bere sare sozialean. Eta abisua bidali dio Teherani: «Oraingoz ez ditugu jo haien hitzetan eraso azkarreko ontziak diren horiek, ez baititugu mehatxutzat. Halere, guk ezarritako blokeora hurbiltzen badira desagerrarazi egingo ditugu». Neurri honekin Trumpek esan du Irani eragotzi nahi diola nazioarteari «xantaia» egin ahal izatea. Blokeoa indarrean sartu ostean emandako prentsaurreko batean adierazi du Teheran ez dela petrolioarekin negoziorik egiten ari, eta akordio bat lortu nahi duela. Hori bai, oroitarazi du iragan astean onartutako meniak indarrean segitzen duela. Iranentzat tresna estrategikoa izan da itsasartea gatazkaren hasieratik. Izan ere, bertatik igarotzen da mundu osoko petrolio ekoizpenaren %20, eta hura itxi izanak nabarmen garestitu ditu erregaiaren prezioak, baita inflazioaren beldurra haizatu ere. Hori izan da, neurri handi batean, Etxe Zuria negoziazio mahaian eserarazi duena, baita lehen elkarrizketetako gai nagusia ere. Larunbatean hasitako negoziazioek 21 ordu iraun zuten, baina ez zuten esperotako emaitzarik eman. Ondorioz, Trumpek sare sozialetan iragarri zuen atzo armadari agindu ziola itsasartera sartu edo bertatik irten asmo duen ontzi oro geldiarazteko. Noski, erabakiarekin «erabat ados» agertu da gaur Benjamin Netanyahu Israelgo lehen ministroa, eta erran du Trumpek «egin behar zuena» egin duela. Trumpen agindua ez da itsasartera mugatzen. AEBetako estatuburuak iragarri du Iranekin pasabidea adostu eta nazioarteko uretara irten diren ontziak ere geldiaraziko dituztela. «Pasabidea legez kanpo ordaindu dutenak ez dira seguru izango itsas zabalean». Horrez gain, Ormuzen jarritako minak ere suntsituko dituztela iragarri du Etxe Zuriak. Trumpen asmoak ikusita, Irango Guardia Iraultzaileak jakinarazi du itsasartera edozein ontzi militar sartzea su etena urratzea izanen dela, eta «erantzun irmoa» emanen duela bueltan. Are, azaldu du «etsaien ontziek» ez dutela eskubiderik Ormuzko itsasartea zeharkatzeko. Irango Parlamentuko presidente Mohamed Baqer Qalibafek ere ez du beldurrik erakutsi Trumpen mehatxuen aitzinean. Aitzitik, sinistuta dago haren erabakiek ez dutela «inongo eraginik» izanen Iranen. «Estatu Batuek berriz ere proban jartzen bagaituzte, are lezio handiagoa emango diegu. Laster sentituko duzue gasolinaren nostalgia, 4 edo 5 dolarretan jartzen denean». Eta ez dirudi berandu izanen denik, dagoeneko hasi baita berriro petrolioaren prezioa igotzen: Europako findegien erreferentziazko Brent upela %3 garestitu da eta 98 dolarreraino heldu. 22.000 Ormuzen itxierak zenbat milioi euroko gainkostua eragin duen erregai fosiletan. Ursula von der Leyen Europako Batzordeko presidenteak salatu du Ormuz itxita mantentzeak 22.000 milioi euroko gainkostua eragin duela erregai fosiletan, eta «ondorio oso-oso larriak» jasaten ari dela Europa. AEBetako presidentearen iragarpenaren ostean, atzo, armadak berak azaldu zuen blokeoa Irango itsasontzientzat izango dela, eta pasabidea libre izango dutela AEBek Golkoan dituzten aliatuen itsasontziek edo haien portuetara doazenek. Bada, blokeoa indarrean sartu baino ordu batzuk lehenago ohar bat bidali du AEBetako armadak, eta erran du «edozein ontziri» itxiko zaiola pasabidea, «daraman bandera daramala ere». Berehala iritsi dira nazioarteko erreakzioak, eta Trumpek hartutako erabakiaren kontra egin dute horietako anitzek. Keir Starmer Erresuma Batuko lehen ministroak, kasurako, argitu du ez dutela itsasartearen blokeoa babestuko: «Itsasartea ixteak esan nahi du petrolioa eta gasa ez direla merkatura iritsiko, prezioak igoko direla, eta jendeak energia faktura altuagoei egin beharko diela aurre. Nik ez dut hori gertatzerik nahi; gastuak jaistea nahi dut». Erruaren zati handi bat, baina, Iranen gain utzi du, argudiatuta hura izan zela lehena Ormuzko itsasartea ixten: «Iran da itsasarteko trafikoari eta ontziei murrizketak eragin dizkiena eta nazioarteko zuzenbidea urratzen ari dena». Ursula von der Leyen Europako Batzordeko presidenteak ere nabigazio librea exijitu du Ormuzko itsasarterako. Europako Batasuneko herrialdeen zorrak mugatzen dituzten arauen gainean ere solastatu da, eta esplikatu du oraindik ez direla «baldintzak» betetzen arau horiek bertan beheiti uzteko. Eta honakoa gaineratu du: «Ekialde Hurbilean ez da bakerik egongo Libanok sutan jarraitzen duen bitartean». Puntu gatazkatsua Teheranek balizko akordio baterako aurkeztutako hamar puntuko dokumentuko eskakizun nagusietako bat zera da, hain zuzen ere, Ormuzko itsasartearen erabateko kontrola bereganatzea. Iranek iradoki ere egin du itsasartea baliatzen duten ontziek ordaindu egin beharko dutela pasabidea. Nazioartearentzat «nabigatzeko askatasuna urratzea» litzateke halako zerga bat ezartzea. Trumpek berak behin baino gehiagotan esan du itsasartea zabaltzea ez dela bere ardura, baina nazioarteko agintariek berari egozten diote Iranek hura itxi izanaren ardura, Teheranen aurka hasitako gerraren ostean blokeatu baitzuen itsasartea Iranek, eta iragarri baitu ez duela irekiko Israelek Libanoren aurkako erasoaldia amaitu ezean. Hainbat herritar gaur Beiruten, Israelen erasoek suntsitutako eraikin batzuen aurrean. WAEL HAMZEH / EFE Alde horretatik, bilera garrantzitsua egingo dute bihar Washingtonen Israelek eta Libanok AEBetan dituzten enbaxadoreek, «su etena lortzeko bide bat eztabaidatzeko». Hala adierazi du Ghassan Salame Libanoko Kultura ministroak: «Jarduera militarrean etenaldi bat eragin behar dugu, eta hori prestatzeko bilduko gara bihar». Hain zuzen ere, Irango eta Libanoko gatazkak elkarrengandik bereizi nahi ditu Libanok, eta Atzerri ministroak erran du horrexegatik hasiko dela Israelekin «zuzenean» negoziatzen —bihar dute bilera—. Joseph Aoun Libanoko presidentearen esanetan, «konponbide jasangarri bat» lortzeko aukera dago negoziazioetan, baina Israeli ohartarazi dio bi aldeek eman behar dutela amore zerbaitetan. «Israelek jaramon egin behar die Libanon, herrialde arabiarretan eta nazioartean egin dizkioten eskariei, eta erasoak gelditu behar ditu eta negoziatzen hasi, adierazi du Aounek berri agentzietara bidalitako ohar batean. Baina oraingoz behintzat, Libanoko lurrak ez dira baretu. Libanoko albiste agentzia nazionalak erran du goizean goiz Israelgo armadak erasoak egin dituela herrialdearen hegoaldean, eta gutxienez bortz pertsona hil dituela. «Libanon ez zegoen su etenik», adierazi du Benjamin Netanyahu Israelgo lehen ministroak. Hezbollah talde xiitak, jarraian, drone bidez eraso die Israelgo soldaduei, eta argitu du hark ere Israelen eta AEBen erasoak amaitu arte jarraituko duela erantzuten. Bide batez, Israelgo berri agentzia batek iturri ofizialak aipatuz erran duenez, «egun gutxi barru» eskuratuko du Israelek Libano hegoaldeko Bint Jbeil hiriaren kontrol osoa. Israelgo armadaren arabera, Hezbollah taldeko «ehunka terrorista» hil dituzte hiri horretan.

Kolpea hartu du Viktor Orban Hungariako lehen ministroak, eta orbainduta amaitu du azkenerako. Atzo egin zituzten herrialdeko parlamenturako bozak, eta Tisza alderdiko Peter Magyar oposiziokide kontserbadoreak irabazi ditu; hala, «erregimen mafiosoa» aldatzeko prest dagoela ziurtatu du gaur emandako hitzaldi batean. Lortutako babesak bide emango dio Orban ultrak lau agintaldiz ezarri dituen lege eta neurriak bertan behera uzteko; izan ere, botoen %53 eskuratuta, ganberako ordezkarien bi heren baino gehiago haren alderdikoak izango dira: 199tik 137. Nazioarteko harremanei dagokienez, Magyarrek gaur iragarri du Hungariak beste jarrera bat izango duela. EB Europako Batasunera hurbilduko dela hitzeman du, baita Nazioarteko Zigor Auzitegira itzuliko dela ere. Hauteskunde kanpainan, Orbanen gobernuari ustelkeriaz aritzea leporatu izan dio Tisza alderdiko buruak behin eta berriz. Eta «talde kriminal antolatu» batek zuzendutako herrialdea aldatzeko ordua dela nabarmendu du gaur, behin bozak irabazita. «Zuzenbide estatu demokratikoan oinarritutako herrialde bat eraiki nahi dugu, adinekoak errespetatzen dituena, eta adingabeak eta jabetza pribatua babesten dituena». Halaber, esan du trantsizio «azkarra eta laburra» izatea nahi duela, eta Tamas Sulyok herrialdeko presidenteari eskatu dio prozesua azkartzeko. Behin parlamentu berria osatuta, presidenteak lehen ministrogai bat proposatu behar du, eta ganberaren erdiak bozkatu behar du hautagaiaren alde. Espero da maiatzaren amaierarako Magyarrek gobernua osatu ahal izatea. Aintzat hartzekoa da Fideszetik ateratakoa dela lehen ministro izango dena, Orbanen alderditik bertatik, eta moderatuagoa izanagatik ere, zenbait kontutan bat egiten duela Orbanen politikekin. Fideszen «alderdi-estatu» eredua desegin eta «zuzenbide estatua» berrezarriko duela hitzeman du, baina, immigrazio politikei dagokienez, ultraren ildoei eutsiko die Magyarrek. Besteak beste, gaur baieztatu du ez dituela kenduko Orbanek 2015ean hegoaldeko mugan jarritako hesi arantzadunak. Magyarrek gaineratu du Nazioarteko Zigor Auzitegira itzuliko dela Hungaria. Orbanek epaitegi hori uztea erabaki zuen, 2024ko azaroan Benjamin Netanyahu Israelgo lehen ministroa atxilotzeko agindua eman zuelako. Halere, gaur aurreratu duenez, agintari berriarekin ez da aldatuko Budapesten eta Tel Aviven arteko harremana. Bruselarekin duena, ordea, bai. Gaur Magyarrek Budapesten egin du agerraldia, Hungariako banderaz beteriko agertoki batean. Baina, Orbanek ez bezala, bazterretan EBko bi bandera ere jarri dituzte. Izan ere, europazalea da Magyar, europarlamentaria, eta hitzeman du herrialdeak EBko kideekin dituen «liskar guztiak» konponduko dituela. «Gure herria Europako Batasunean zegoen, dago eta egongo da», esan zuen atzo lehen ministro izango denak, hauteskundeen ostean Budapesten egindako agerraldian. Hungariak, Orban errusiazalearen gidaritzapean, oztopoak jarri izan dizkie talde komunitarioaren erabaki eta politika bateratuei, eta, bide batez, ikusi beharko da Magyarrek blokeoa noiz kenduko ote dion Bruselak Ukrainari eman nahi dion 90.000 milioi euroren maileguari, esana baitu hala egingo duela. Tisza alderdiaren garaipenak lasaitua ekarri die behintzat EBko kideei eta instituzioei. «Hungariak Europa aukeratu du. Europak beti aukeratu izan du Hungaria. Herrialde batek Europarako bidea erreklamatu du berriro. Batasuna indartu egin da», idatzi zuen atzo Ursula von der Leyen Europako Batzordeko presidenteak ingelesez eta hungarieraz, sare sozialetan. Era berean, Antonio Costa Europar Kontseiluko presidenteak adierazi zuen «estuki» aritu nahi duela Magyarrekin, «Europa toki sendoago eta oparoago bat bilakatzeko». 2 Lehen ministroek, gehienez, zenbat agintaldi egin ahal izatea duen asmo Magyarrek. Viktor Orban berriro agintera iristea saihestu nahi du Peter Magyar lehen ministro izango denak. Horregatik, gaur jakinarazi du bere asmoa dela konstituzio berri batean jasotzea lehen ministroek, gehienez, bi agintaldi egin ahalko dituztela. Orbanek bost agintaldi egin ditu: bat 1998tik 2002ra; eta lau 2010etik 2026ra. «Hungaria, Polonia, Europa, berriro elkarrekin! A zer garaipena, lagun maiteok! Errusiarrak, ospa etxera!», idatzi zuen atzo, berriz, Donald Tusk Poloniako lehen ministroak, sare sozialetan. Halaber, Giorgia Meloni Italiako lehen ministroak esan zuen «begi bistakoa» dela Tiszak irabazi duela, eta Orban «lagunari» ere eskertu zion azken urteotako «lankidetza bizia». Bestelakoa izan da Eslovakiaren eta Txekiaren erreakzioa. Hungariarekin batera, bi herrialde horiek EBk Ukrainari eman nahi dion mailegua ez blokeatzea erabaki zuten abenduan, baldintza baten pean: 90.000 milioi euroak gainontzeko kideek finantzatzea, eta ez hiru herrialde horiek —kontua da Ukrainak urtarrilean eten zuela Druzhba oliobidea, eta, horrekin batera, Errusiako petrolioaren hornidura, argudiatuta Moskuren erasoek instalazioak hondatu zituztela; horiek horrela, Orbanek blokeatuta dauka mailegua—. Sare sozialetan, Andrej Babis Txekiako lehen ministroak adierazi du ez dela erraza «Orban bezain etsai gogor bati kontra egitea», eta Magyarrek ezin duela huts egin. Robert Fico Eslovakiako lehen ministro errusiazaleak ere Orbanen gidaritza goraipatu du, eta Magyarrekin elkarlanean aritzeko prest dagoela esan du sare sozialetan. Batera edo bestera, atzoko garaipen zabalak bide emango dio Magyarri Konstituzioa aldatzeko eta Orbanek lau agintaldiz ezarritako lege eztabaidatsuak bertan behera uzteko: hauteskunde sistemaren erreformak, auzitegietako epaileen izendapenei dagozkienak… Bi hereneko gehiengoa lortu du Orbanek lau agintaldiz, eta, orain, Magyarrek etenarazi dio bolada. Ultrak oposizioan Fidesz alderdi ultra eta errusiazaleak 55 eserleku baino ez ditu eskuratu atzoko hauteskundeetan —botoen %38,4 lortu ditu—. Orbanek porrota onartu zuen oraindik botoak zenbatzen ari zirenean, gauean Budapesten egindako agerraldi batean: «Irabazi duen alderdia zoriondu dut», esan zien Fideszen jarraitzaileei. «Mingarria zaigu porrota, baina emaitzak argi utzi du ez digutela eman gobernatzeko ardura eta aukera», erantsi zuen, eta berretsi oposiziotik arituko direla: «Ez dugu amore emango». Gure Aberria eskuin muturreko alderdia da ordezkaritza lortu duen hirugarren zerrenda —botoen %5,8 eta sei eserleku lortu ditu—, eta, hortaz, ezkerreko ezein alderdik ez du lortu ordezkaririk parlamentuan. «Hungariako erregimena eraitsi dugu elkarrekin», esan zuen atzo gauean Magyarrek. Nabarmendu zuenez, «Hungaria demokratikoaren historian inoiz ez du horrenbeste jendek bozkatu», parte hartzea %79,5ekoa izan baitzen —1989an gobernu komunista bertan behera geratu osteko handiena da—. Lortutako gehiengo erabakigarria ere eskertu zuen Magyarrek: «Alderdi bakar batek ere ez du halako sostengua lortu orain arte». Agintaldi luzea izan du Orbanek; Europako Batasunean agintean urte gehien zeramatzan gobernuburua da. Oposizioa zatituta egon da, eta urte hauetan guztietan ezin izan dio agintea kendu Orbani, harik eta Magyarrek Tiszako lidergoa hartu duen arte. Ibilbide laburreko alderdia da Tisza, duela sei urte sortu baitzuten; Fideszi kontra egiteko bultzada, ordea, duela bi urte lortu zuen, Magyarrek Orbanen alderdia utzi eta Tiszako lidergoa hartu eta gero. magyarrek Orbanen politiken inguruan duen jarrera Ukrainako gerra. Viktor Orban Hungariako lehen ministroak blokeatua du EB Europako Batasunak Ukrainari hitzemandako mailegua, argudiatuta halako neurriek gatazka hedatuko luketela. Magyarrek, ordea, hitzeman du bide emango diola Bruselaren 90.000 milioi euroko laguntza ekonomikoari, nahiz eta duen asmorik Ukrainari laguntza militarrik emateko. LGTBI komunitatea. 2021ean onartutako lege batek debekatu egiten du adingabeen artean homosexualitateaz edo genero aldaketaz aritzea «haurrak babesteko» aitzakian. Hori oinarri hartuta, debekatu egin zituzten sexu berekoen arteko harremanak eta genero aniztasuna agerian uzten zituzten filmak. Magyarrek ez du zehaztu legea bertan behera utziko duenik, baina bai adierazi du ez dutela inor epaituko «desberdina izan edo desberdin maitatzeagatik». Migrazio politikak. «Zibilizazioen arteko talka» eragingo lukeela argudiatuta, migrazio politika gogorrak bultzatu izan ditu Orbanek. Baina, aldi berean, lan merkatuko ateak ireki dizkie Asia ekialdeko migratzaileei. Magyar bera ere eskuineko kontserbadorea izanik, ez da migratzaileei mugak zabaltzearen aldekoa. Ustelkeria eta justiziaren independentzia. Bruselak blokeatuak ditu Hungariarentzako 19.500 milioi euroren funtsak, ustelkeriaren aurkako neurri nahikorik ez hartzea eta independentzia judiziala kolokan jartzea egotzita. Magyarrek hitzeman du EBko buruzagiekin bilduko dela datozen asteetan funts horiek desblokeatzeko.

Bigarren agintaldia du Getxoko (Bizkaia) udalean Amaia Agirre alkateak, baina ez du hirugarrenik izango. Agintariak alderdikideei jakinarazi dienez, ez da EAJren alkategaia izango 2027ko udal hauteskundeetan. Azken urteetan, Irurak Bat jauregia eraisteari buruzko auzia egon da eztabaida politikoaren erdigunean Uribe Kostako udalerri horretan: oposizio guztiak kargua uzteko eskatu zion urtarrilean, baina Agirrek aurrera egitea erabaki zuen. EAJk esan duenez, «laster hasiko da» Getxoko alkategaia aukeratzeko prozesua. Gutun batean, Agirre alderdikideei zuzendu zaie, jakinarazteko 2027ko hauteskundeetan ez dela Getxoko alkatetzarako hautagai izango. Esan duenez, «erabaki pertsonal bat» da hartutakoa, «erraza izan ez dena, baina bai sakon hausnartutakoa». «Legealdi hau amaitzean etapa bat itxiko dela sentitzen dut udalaren gidaritzari dagokionez. Getxo hazarazten jarraituko duten pertsona berriei, begirada berriei eta bulkada berriei bidea irekitzeko garaia dela uste dut», gehitu du. Hala ere, agintaldia amaitu artean «azken egunera arte lan egiten» jarraituko duela nabarmendu du. Oposizioko alderdiek duela hiru hilabete eskatu zioten kargua uzteko, Irurak Bat jauregia eraisteari buruzko auzia tarteko. Elkarrekin-ek mozioa aurkeztu zuen urtarrileko osoko bilkuran haren dimisioa eskatzeko, eta aurrera atera zen, PPk eta EH Bilduk alde bozkatuta. Hala ere, Agirrek Getxoko Udalaren buru izaten jarraitzea erabaki zuen. «Getxorekin eta gure proiektu politikoarekin dudan konpromisoak tinko dirau», berretsi du gaur. «Udalerria eraikitzen» Irurak Bat jauregiaren eraisketagatik auzipetutako EAJko hiru zinegotziak kargutik kentzea ere erabaki zuen Udalbatzak, urtarrileko osoko bilkuran. Eraikin hori Getxoko ondare historikoaren parte zen, eta 2024ko abuztuan eraitsi zuten, luxuzko etxebizitzak egiteko. Biurban etxebizitza kooperatibak eraitsi zuen, eta EAJren bederatzi zinegotzietatik bi bertako bazkide ziren. Getxoko 2. Instrukzio auzitegiak auzi horrekin lotuta hamar pertsona inputatu ostean —tartean EAJko hiru zinegotzi horiek— etorri ziren dimisio eskaerak. Ikusteko dago oraindik noiz deituko dituzten deklaratzera. Agirreren ustez, ordea, «[EAJren] proiektua indartzen jarraitzeko garaia da, etorkizuna duen udalerri kohesionatu eta modernoa eraikitzeko bidean». Alkateak eskerrak eman dizkie alderdikideei urte hauetan guztietan emandako «laguntza eta konfiantzagatik, eta egindako lan guztiagatik»; eta adierazi die egindako bidea haiei guztiei esker posible izan dela, «eta hala izaten jarraituko duela». Iñigo Ansola EAJko Bizkai Buru Batzarreko presidenteak, berriz, Agirreri eman dizkio eskerrak, «egindako lanagatik eta agintaldian izandako konpromiso eta inplikazioagatik». EAJk esan duenez, «laster hasiko da» Getxoko alkategaia aukeratzeko prozesua.

Dario sasoi betean dago. Pilotari errioxarrak horixe erakutsi du gaur Zumaian (Gipuzkoa), Erik Jakari ez baitio aukerarik ere eman (10-22). Hasieratik hartu du aurrea (2-10, 3-12), eta bikain aritu da bai defentsan, bai erasoan. Sakez min egin du Dariok, eta ia uneoro defentsan aritzea egokitu zaio Jakari. Lizartzakoa, berriz, ez da fin ibili sake-errematean. Une batean partidan sartzear izan da (6-12), baina Dariok, sakea berreskuratu duenean, lehengo bidetik segitu du. Buruz Buruko Txapelketako final laurdenetako ligaxkako lehen jardunaldiko partida da gaur jokatu dutena. Datorren astean bertan jokatuko dute bigarren jardunaldia: Dariok Altuna III.aren kontra, eta Jakak Lasoren aurka.

Gaur goizean 54 urteko motor gidari bat hil da AP-8 errepidean, Zarautz (Gipuzkoa) parean. Gidatzen ari zen motorra errepidetik irten da, eta hesi baten aurka jo du. Larrialdi zerbitzuek bizirik topatu dute gizona, eta anbulantzian eraman dute Donostia ospitalera. Han hil da, ordea, istripuak eragindako zauri larrien ondorioz. Ertzaintza gertatutakoa ikertzen ari da.

Skyrunner World Series zirkuituko laugarren proba jokatu zen atzo Benalmadenan (Malaga, Espainia): Calamorro Skyrace (27 km eta 2.270 m+), eta La Palma uharteko Acantilados del Norte hirugarren probako irabazle berak izan ziren laugarrenean ere: Sara Alonso donostiarra (Gipuzkoa) emakumezkoetan, eta Manuel Merillas espainiarra gizonezkoetan. Sara Alonso hasiera-hasieratik aurreratu zen, eta kilometroz kilometro, zabaltzen joan zen lehiakideekiko aldea. Anoa gune batean, bidoi malgua falta zuela eta, zertxobait urduritu zen, baina aparteko arazorik gabe lortu zuen garaipena (3.25.42). Zortzi minutu pasatxora helmugaratu zen Jane Maus estatubatuarra, eta Shangave Balendran norvegiarra izan zen hirugarren. Pozik zen Alonso garaipenarekin: «Asko gozatu dut, batez ere ibilbide osoan animatzen zegoen jende guztiaren aupadarekin. Une zail bat izan dut bigarren anoa gunean, ez zegoelako nire soft flask bidoia, baina laguntza eskatu eta mundu guztia laguntzeko prest agertu da». Nabarmentzekoa izan zen Ainhoa Garikanoren seigarren postua ere. Berriki, Kolazino Egunean, EMFko txapeldun izan da tolosarra, eta denboraldi hasiera oso ona egiten ari da. Hamar aurrenekoen artean helmugaratu zen Oihana Zubillaga anoetarra (Gipuzkoa) ere, bederatzigarren. Hogeita bost aurrenekoen artean sailkatu ziren beste hainbat euskal korrikalari: Irati Azkargorta (12), Leire Uribe (14), Irune Velez de Mendizabal (17) eta Lola Oiarzabal (19). Gizonezkoetan, ikusgarria izan zen Manuel Merillas espainiarraren eta Frederic Tranchand frantziarraren arteko lehia. Azken-azkeneko ertzean jo zuen erasoa Merillasek, eta 24 segundo eskaseko aldearekin lehen postuan gurutzatu zuen helmuga Leongo korrikalariak. Tom Spencer eskoziarra izan zen hirugarren. Euskal korrikalarien artean, Gontzal Murgoitio elorriarra (Bizkaia) izan zen lehena, hamaikagarren. Hodei Samaniego sestaoarra hamahirugarren izan zen eta Paul Ormaetxea muruetarra (Bizkaia) hamalaugarren. Hogeita bost aurrenekoen artean sailkatu ziren beste hainbat euskal korrikalari ere, hala nola Beñat Ibañez (16), Oier Zubeldia (18), Aitor Zunzunegi (23), Jokin Amozarrain (24) eta Iñigo Macias (25). Sailkapen guztiak, esteka honetan.

Lehengo lepotik du burua Jokin Altunak. Joan den urtean buruz buru txapeldun izan ondoren, berriz ere txapela janzteko hautagai nagusia dela azaldu du amezketarrak, ongi merezita gainditu baitu Unai Laso, Iruñeko Nafarroa Arena pilotalekuan: 22 eta 16. Harmailak goraino bete direlarik, partida lehiatua jokatu dute bi pilotariek, baina ez oso distiratsua. Binakako finalean elkarren kontra aritu zirenetik ez dira bi aste igaro oraindik, eta buruz burukoari neurria hartzea kosta egin zaie hasieratik. Kalitate handiko tanto batzuk jokatuagatik, hanka sartzeak ere ohi baino gehiago egin dituzte, eta freskotasun handiagoa erakutsi duelako irabazi du Altuna III.ak. Hala, puntu baliotsua sartu du poltsikoan, final-laurdenetako ligaxkari eskuin hankarekin ekitea beti baita garrantzitsua. Beroketa lanetan fresko eta bizi sumatu du bere burua gipuzkoarrak, baina partidari hasiera ezin okerragoa eman dio, lehen sakea falta egin baitu. Hanka sartze horrek ez du bere onetik atera, eta olatu paregabea hartu du berehala: 0-1 galtzen hasi arren, 6-1 aurretik jarri da. Erakustaldia eman du tarte horretan. Ezker-eskuin pilota dotore mugitu du, eta erasokor jokatzeak fruituak eman dizkio. Defentsa lanean gorputzari sekulako behartua eman behar izan dio Lasok. Dena den, lanean jarraitu du, eta saskitik bere pilota atera ahal izan duenean ez du barkatu nafarrak. Odolkiak ordainetan eman dizkio Altuna III.ari, eta seina berdindu du norgehiagoka. Ordurako ehun pilotakadatik gora jo dituzte bi pilotariek, partidaren gogortasunaren seinale. Boladaka joan da neurketa hortik aurrera. Berriz aurrea hartu du txapeldunak, 9-6, baina, bost tanto jarraian eginda, 9-11 aurretik jarri da Laso. Orduantxe lortu du partidan lehen aldiz aurretik jartzea Baikokoak. Sakearekin asmatu du gehienbat. Tanto ederrak jokatu dituzte biek ala biek, baina opariak ere gehitxo egin dituzte. Horma bikoarekin tematuta jardun dute. Pilotalekuaren ezaugarriak kontuan izanda, horma bikoz ahalegindu dira tantoak bukatzen, baina ez dute asmatu. Lehen atsedenaldi luzera 12 eta 11 aurretik heldu da Altuna III.a, eta ordura arte denetik izan du partidak: onetik eta txarretik. Emozioa, ordea, ez du falta izan. Gaurkoa buruz buru seigarren aldiz izan dute elkarren kontra Altuna III.ak eta Lasok, eta orain arte hamabi tantotik gora ez zituen inoiz egin galtzaileak. Gaur ez da hala izan. Lasoren susperraldia Lehen atsedenaldi luzera tanto bat aurretik heldu da Aspekoa (12-11), baina etenalditik bueltan oso denbora laburrean lortu du aldea: 18 eta 13. Laso oso bigun aritu da tarte horretan. Pilota ez du batere luzatu atzera, eta Altuna III.ak itxura hobea azaldu du fisikoki. Aparteko ezer egin gabe, ezin hobeki bideratu du partida. Bazirudien oso gertu zuela garaipena, baina susperraldi bikaina izan du nafarrak, meritu handikoa. Defentsan lan handia egin du, eta erasoan bestelako taktika kantxaratu du. Tantoak lantzearen alde agertu da, eta orduantxe jo ditu pilotakadarik onenak. Horri esker, 18-16 gerturatu da markagailuan. Irekita egon da partida azken txanpara arte, baina une erabakigarrian ikusgarria izan da Altuna III.ak erakutsitako talentua. Hortzak estutu ditu, eta azken lau tantoak erremate dotoreei esker egin ditu: bi dejadaz, bestea zabalera moztuta, eta azkenekoa horma bikoz. Sekula baino erasokorrago jokatu du, eta ongi atera zaizkio jokaldiak. Garaipen erosoa eskuratu du azkenean: 22 eta 16. Final-laurdenetako lehen partida irabaztea garrantzitsua izan arren, Laso menderatu izanak balio bikoitza izan dezake txapeldunarentzat. Multzo berean, Dariok eta Erik Jakak neurtuko dituzte indarrak bihar, Zumaian (17:00, ETB1). Joan den astean partida bikainak jokatuta iritsiko dira biak, eta errioxarra aterako da faborito. Beste multzoan, berriz, Iker Larrazabalek garaipen ederra eskuratu zuen atzo Azkoitian (Gipuzkoa), Iñaki Artola egungo txapeldunordearen aurka: 22-17.

Pakistan bitartekari zela, Islamabaden eseri dira AEBak eta Iran, eta ez nolanahi, gainera, aurrez aurre batzartu baitira gaur, iazko udaberriko eta urte hasierako zeharkako negoziazioetan ez bezala. Datozen orduetan negoziatzen jarraitzekoak dira aldeak, eta, lehen saioa amaituta, Teheranek ohartarazi du ez direla ados jarri Ormuzko itsasartearen kudeaketaren inguruan. Hori esan du Tasnim Irango berri agentziak, iturri ofizialak aipatuta. Teheranek zera nahi du, finean: aitor diezaiotela pasabidearen gaineko kontrola. Bide batez, egotzi die AEBei bileran «eskaera bitxiak» egitea. Ezin zaio, baina, gaurko saioari garrantzirik ukatu, Washingtonek eta Teheranek 1979ko Irango Iraultzaz geroztik egin dituzten bileren artean maila gorenekoa izan baita. Israelek Libanon gaur goizaldean beste hamahiru pertsona hil eta ordu batzuetara hasi dituzte elkarrizketak Pakistango hiriburuan. Iranen ordezkaritzaren buruak, Mohamad Baqer Qalibaf parlamentuko presidenteak, bi baldintza jarri zituen atzo negoziazioei ekiteko: Washingtonek zigor ekonomikoak kentzea Teherani, eta Israelek Libanoren kontrako erasoaldia etetea. Ez bata ez bestea ez dira bete, ordea. AEBetako ordezkaritzaren burua JD Vance izan da, eta alboan eduki ditu Donald Trump presidenteak Ukrainako eta Gazako gatazkak konponbidean jartzeko egindako bileretara ere bidali ohi dituen negoziatzaileak: Steve Witkoff, iazko urtarrilean Etxe Zurira iritsi arte higiezinen sektorean jardundakoa; eta Jared Kushner, presidentearen suhia. Irango Atzerri ministro Abbas Araghtxik ere bilkuran parte hartu du. Washingtonek eta Teheranek bi asterako tregoa bat adostu zuten asteazkenean —otsailaren 28an AEBek eta Israelek Iranen kontrako erasoaldia hasi zutenetik Trumpek Teherani amore emateko egindako bosgarren ultimatumaren epemuga betetzeko oso denbora gutxi falta zenean—, eta epe horrek negoziatzeko behar luke. Trumpen esanetan, su eten bat ezartzea ez ezik, Ormuzko itsasartea irekitzea ere adostu zuten bi aldeek. Baina Iranek kontrolatutako pasabide horretatik tantaka ari dira pasatzen itsasontziak azkeneko egunetan. Espezializatutako webguneen arabera, dozena bat ere ez egunero; eta kontuan hartu behar da erasoaldiaren aurretik 140 inguruk zeharkatzen zutela —handik igarotzen da munduan kontsumitzen den petrolioaren %20 inguru—. Menia indarrean sartu eta ordu bakan batzuetara, Teheranek jakinarazi zuen trafikoa berriro blokeatu zuela, argudiatuta Israelek ez zituela eten Libanoren kontrako erasoak. Horiek horrela, elkarrizketen inguruko iturriak aipatuz hainbat hedabidek argitaratu dutenez, behin gaur ordezkaritzen buruek bilera egin eta gero, bi aldeetako batzordeetako kideek hitz egiten segituko dute. Emakume bat gaur Teheranen, AEBen eta Iranen arteko bilera bat irudikatzen duen horma irudi baten aurretik igarotzen. ABEDIN TAHERKENAREH / EFE Pakistan ari da bitartekari, eta, bost izarreko hotel batean hiruko bilera hasi aurretik, Shehbaz Sharif Pakistango lehen ministroa, anfitrioia, aldeekin bildu da, banaka: aurrena Qalibaf Iranen ordezkaritzaren buruarekin, eta gero Vancerekin. Artean hiruko bilera hasi gabe zegoenean, zenbait komunikabidek argitaratu dute, Teherango iturriak aipatuz, AEBek oniritzia eman diotela Qatarren eta nazioarteko beste banku batzuetan Iranek dituen funtsak desblokeatzeri, «borondate oneko keinu gisa». Handik gutxira, hori «gezurra» dela esan die AEBetako goi kargudun batek Etxe Zuriarekin batera Islamabadera bidaiatu duten kazetariei. TRUMPEk esan du ORMUZEN MINAK KENTZEN hasi direla aeb-ak Iranek Ormuzko itsasartean jarritako pertsonen kontrako minak kentzen hasi dira AEBak. Hori idatzi du Donald Trump AEBetako presidenteak gaur Truth Social bere sare sozialean. Etxe Zuriko maizterraren arabera, «mundu guztiari mesede bat egiten» ari dira modu horretan. «Txinak, Japoniak, Hego Koreak, Frantziak, Alemaniak eta beste askok, harrigarriki, ez dute ez adorerik ez borondaterik lan hori beren kabuz egiteko». Ordu batzuk geroago AEBetako armadak ohar batean adierazi duenez, hori egiteko «baldintzak ezartzeko» operazio bat hasi dute. Iranek ez du pasabidea guztiz ireki azken egunetan, ezin izan dituelako mina guztiak bilatu, eta ez duelako gaitasunik horiek kentzeko. Hori kaleratu du gaur The New York Times egunkariak, AEBetako funtzionarioak aipatuz. Informazio horren arabera, Iranek minak jarri zituen itsasartean aurreko hilabetean, Israelek eta Iranek haren kontrako erasoaldia hasi eta gutxira. Trumpen hitzetan, Iranek horretarako erabilitako ontziak «itsas hondoan» daude. Tregoa bat indarrean egonagatik, gerra informatiboarekin segitzen dute aldeek. Izan ere, Axios hedabideak Pentagonoko iturriak aipatuz argitaratu duenez, AEBetako armadako hainbat ontzik Ormuzko pasabidea zeharkatu dute gaur. Ordu batzuk geroago, informazio hori gezurtatu du Tasnim Irango berri agentziak, baina AEBetako armadaren buruzagitzak X sare sozialean idatzi du ondoren baietz, bi gerraontzik gurutzatu dutela, eta «misio bat» zutela: han pertsonen kontrako minarik ez dagoela ziurtatzea. Asteartean, Washingtonen Hiruko bileraren eten batean, NNA Libanoko berri agentziak plazaratu du albistea: Israelek arratsaldean ere jo duela Libano hegoaldea, hainbat drone jaurtita. Benjamin Netanyahu Israelgo lehen ministroa prest dago Libanorekin hizketan hasteko Hezbollah milizia xiita armagabetzeari buruz; hori esan du, bai, baina, aldi berean, iparraldeko bizilagunari eraso egiten segituko duela ere nabarmendu du. Otsailaren 28az geroztik 2.000 pertsona baino gehiago hil ditu Israelen erasoak Libanon. [articles:2156576] Haaretz Israelgo komunikabideak gaur kaleratu duenez, Trumpek zera eskatu dio Netanyahuri: Libanoko hiriburu Beiruten kontrako erasoak eteteko gutxienez —300 pertsonatik gora hil zituen Israelek han asteazkenean, AEBek eta Iranek su etena adostu zuten egunean—, eta Libanoko ordezkariekin hitz egiteko. Joseph Aoun hango presidenteak atzo gauean iragarri zuenez, bi aldeak Washingtonen bilduko dira datorren asteartean.

Naiz agerkariak jakinarazi duenez, preso bat hilik agertu zen atzo goizean Zaballako espetxean (Araba). Gorpuak ez zuen indarkeria zantzurik, baina autopsiaren emaitzaren zain daude zergatik hil den jakiteko. Aurten Euskal Herriko espetxeetan hildako laugarren presoa da Zaballan zendutakoa. Otsailaren 5ean, 35 urteko preso bat hil zen, Zaballako espetxean hura ere; haren senideek salatu zuten ez ziotela arta egokia eman. Martxoaren hasieran, berriz, preso bat hil zen Iruñeko espetxean; Salhaketa elkarteak jakinarazi zuenez, 80 urte baino gehiago zituen, eta bihotz-biriketako geldialdia izan zuen. Azkenik, martxoaren 20an preso batek bere buruaz beste egin zuen Baionako presondegian; 23 urte zituen, eta, Sud Ouest hedabideak zabaldu zenez, kartzelako bakarkako ziega bakarrean zeukaten, arazo psikiatrikoak zituelako, eta telefono kable batekin urkatu zuen bere burua.

Iran eta AEBak bihar dira Pakistanen negoziatzen hastekoak, Islamabaden. Dena den, Teheranek ohartarazpen bat egin du bildu baino ordu batzuk lehenago: elkarrizketa horiek hasi ere ez direla egingo Israelek Libano bonbardatzen segitzen duen bitartean. Asteazkenean hitzartu zuten su etenean jasotakoa betetzeko exijitu dio Teheranek Washingtoni, eta, akordioan dioenez, Pakistan bitartekariaren arabera, Libano ere barne hartzen du meniak. Hori kaleratu dute gaur Fars eta Tasnim Irango berri agentziek, iturri ofizialak aipatuta. Azken agentzia horrek jaso duenez, Esmaeil Baghaei Irango Atzerri Ministerioko bozeramaileak jakinarazi du Libano ere badela tregoaren parte: «Konpromiso horren kontrako edozein ekintza edo jarrerak esan nahiko luke Ameriketako Estatu Batuek ez dutela bete hitzemandakoa». Hori bete ala ez, «horren arabera» erabakiko du Iranek bihar egitekoak diren elkarrizketetan parte hartu edo ez. Islamabad blindatu dute bi delegazioak bildu bezperan, eta herrialdeko instituzio nagusien egoitzak eta enbaxadak dauden gunerako sarbideetan kontrolak ezarri dituzte Poliziak, indar paramilitarrek eta armadak. Hori adierazi dio hiriburuko Poliziako bozeramaileak Efe agentziari: «Alerta gorenean dago Islamabad». JD Vancek zuzenduko du Islamabaden negoziatzekoa den AEBetako delegazioa, eta, hara joan baino lehen, kazetariei esan die «argibide nahiko argiak» eman dizkiola Donald Trump AEBetako presidenteak. Erantsi du Iranen ordezkariek «asmo onez» negoziatzeko asmoa edukiz gero «eskua luzatuko» dietela. Bestela, «ziria sartzen saiatzen badira, ikusiko dute ez garela hain eskuzabalak izango», esan du Vancek. Trumpek, berriz, mehatxu egin dio Irani, beste behin. The New York Post hedabideari emandako elkarrizketa batean adierazi du gerra ontziak «munizio onenarekin» kargatzen ari dela; «inoiz egindako arma onenekin». Eta ohartarazi du Islamabaden egitera doazen bileran akordiorik lortu ezean, «oso modu eraginkorrean» erabiliko dituela arma horiek. Gerora, Truth Social bere sare sozialean zehaztu du «negoziatzea» dela «irandarrak bizirik egoteko arrazoi bakarra». «Ez dira konturatzen ez daukatela aukerarik», gaineratu du. Erasoak besterik ez Libanon Israelek, nahiz eta prest agertu den Libanorekin negoziatzen hasteko Hezbollah milizia armagabetze aldera, iparraldeko bizilagunari eraso egiten segitzen du. Atzo, azken orduan, armadak ohar batean adierazi zuen Hezbollahren posizioak jo zituela, eta milizia xiitak Tel Aviv eta Ashdod (Israel) bonbardatuz erantzun du goizaldean. Eraso horiek ez dute biktimarik eragin. Halaber, Hezbollahk jakinarazi du Iranen itsas base bat jo duela Ashdodeko portuan, «puntako» misilekin. Israelgo armadak, gainera, garbi utzi du gaur, balizko negoziazioak gorabehera, erasoka segituko dutela. «Armada gerran dago, eta hemen borrokan jarraituko dugu; Iranen dago su etena», azpimarratu du Eyal Zamir armadaburuak gaur Libano hegoaldean, armadak zabaldutako informazioak dioenez. Horiek horrela, Al-Jazeera hedabideak kaleratu duenez, Israelgo armadak Libano hegoaldeko eta Bekaa haraneko zenbait herriren kontrako erasoak egin ditu. Gainera, armadako bozeramaileetako batek sare sozialetan ohartarazi du Hezbollahk «helburu militarrerako» darabiltzala osasun instalazioak eta anbulantziak —frogarik ez du erakutsi—, eta horien kontra ere egingo dutela. Horri erantzunez, Abdinasir Abubak Osasunaren Mundu Erakundeak Beiruten duen ordezkariak zera gogorarazi du gaur prentsaurreko batean, nazioarteko legediak babestu egiten dituela osasun langileak, osasun instalazioak eta anbulantziak. Libanoko NNA agentziak kaleratu duenez, Israelgo armadak pertsona bat hil du gaur herrialdearen hegoaldeko Xarqiyeh herrian, drone eraso batean, eta beste sei hil ditu Jbaa herrian. Horiek horrela izanda ere, AEBek baieztatu dute Libanoko eta Israelgo ordezkariak Washingtonen bilduko direla datorren astean. Hala esan zien atzo kazetariei Estatu Departamentuko iturri batek; ez zuen eguna zehaztu, ordea. Benjamin Netanyahu Israelgo lehen ministroak atzo iragarpena egin eta gutxira, Joseph Aun Libanoko presidenteak erantzun zuen baietz, hitz egiteko prest dagoela, baina AFP France-Press agentziak zabaldu zuen Aounek baldintza bat jarri zuela: Libanon ere su etena ezartzea. Israelek ez du horretarako asmorik, ordea; beraz, Libanoren eta Israelen arteko elkarrizketak ere kolokan daude. Bide batez, Hezbollahren ordezkari politiko Ali Fayyad negoziazio horien kontra agertu zen atzo gauean —hori kaleratu zuen Reuters berri agentziak—, eta Israeli eskatu zion Libano hegoaldetik tropak ateratzeko. Naim Qassem Hezbollahko liderrak esan du «erresistentziak» Israelen kontra jarraituko duela «arnasa» duten bitartean. Miliziak ohar bat kaleratu zuen atzo gauean, eta horretan, Qassemek, datorren astera begirako balizko negoziazioei begira, nabarmendu zuen Israeli ez zaizkiola «debaldeko kontzesioak» egin behar. Atzo gauean, Khawaja Asif Pakistango Defentsa ministroak mezu bat idatzi zuen sare sozialetan. «Islamabaden bake elkarrizketak dauden bitartean, Libanon genozidioa egiten ari dira», salatu zuen, eta «gizadiaren kontrako madarikazioa» deitu zion Israeli: «Herritar errugabeak hiltzen ari da lehendabizi Gazan, gero Iranen, eta orain Libanon». Netanyahuren bulegoak esan zuen «toleraezinak» direla gisa horretako adierazpenak, «batik bat bere burua neutral eta bakearen arbitrotzat duen gobernu batek» esandakoak baldin badira. Gaur, mezu hori ezabatu du Asifek. 1,6 Iranen zenbat milioi emakumek utzi behar izan duten etxea. Ekialde Hurbileko gatazka hasi zenetik 1.600.000 emakumek etxetik ihes egin behar izan dute Iranen, NBEko Emakumeen Sailak emandako datuen arabera; Libanon, berriz, 620.000 emakume inguruk egin dute ihes, Israelen erasoak direla eta. Bien bitartean, bere horretan dirau Teheranek eta AEBek Iranerako hitzartutako tregoak. Hori bai, Kuwaiteko Atzerri Ministerioak herrialdeko armadaren kokaleku bati eraso egitea leporatu die Irani eta «haren aliatuei». Goizaldean kaleratutako ohar batean, azaldu du bart droneekin bonbardatu dituztela «berebiziko hainbat instalazio»; inor hil ez duten arren, eztandek «kalte material esanguratsuak» eragin dituzte: «Erasoan jarraitzeak hondatu egiten ditu eskualdearen eta nazioartearen ahaleginak, zeinak, azken batean, Ameriketako Estatu Batuen eta Irango errepublika islamiarraren arteko su etena lortzen lagundu duten». Jarraian heldu da Irango Guardia Iraultzailearen erantzuna: Fars agentziak jaso duenez, Irango armadako adar horrek ziurtatu du ohar bidez su etena ezarri zutenetik ez dutela erasorik egin eskualdeko herrialdeen kontra, eta, «ausardiaz» iragarriko dutela halakorik eginez gero. «Lan eskasa» Ormuzen Trumpek belarrietatik tira egin dio Irani, Ormuzko itsasartea ia guztiz itxita dagoelako oraindik —irekitzea adostu zuten—. «Iran lan eskasa egiten ari da. Akordioak ez zioen hori!», idatzi du Etxe Zuriko maizterrak gaur, Truth Social bere sare sozialean. Gainera, handik igarotzen diren itsasontziei bidesariak kobratzea egotzi dio Irani. «Horretan dabilela diote txosten batzuek». The Wall Street Journal egunkariak berriki kaleratutako informazio baten arabera, asmo hori du Teheranek. Hori eginez gero, nazioarteko itsas merkataritzaren printzipio bat urratuko luke Teheranek: bakean nabigatzeko askatasuna. Ideia hori jaso zuen Nazio Batuen Erakundearen Hitzarmenak 1994an, itsas zuzenbidea arautzeko orduan. Irango Parlamentuko segurtasun nazionalerako batzordeko buruaren arabera, asmoa da bidesari horiek herrialdeko dibisarekin, rialarekin, kobratzea; horren berri eman du Iranek Mumbain (India) duen kontsuletxeak, sare sozialetan. Espezializatutako webguneek atzo kaleratu zutenez, aurreko 24 orduetan zazpi ontzi igaro ziren itsasartetik —hiru petroliontzi eta beste lau itsasontzi; azken horietako batek Irango altzairua darama Txinara—; Reuters agentziaren arabera, ontzi horietako askok harremana dute Teheranekin. AEBek eta Israelek otsailaren 28an Iranen aurkako erasoaldia hasi aurretik, egunero 140 ontzi inguruk zeharkatzen zuten pasabidea. Keir Starmer Erresuma Batuko lehen ministroa Arabiar penintsulako zenbait herrialdetan egon da, eta Qatarrera heldu da gaur; ohar bateratu bat kaleratu du hango bere homologoarekin, Mohammed bin Abdulrahman al-Thanirekin: gatazka ez hedatzeko, su etenaren gainean «eraiki» behar dela adierazi dute, eta al-Thanik nabarmendu du nabigazio askatasuna bermatu behar dela hornidura kateak ez eteteko. Are, Qatarren zela, Starmerrek jakinarazi du atzo gauean Trumpekin hitz egin zuela telefonoz, eta Ekialde Hurbilekoen «ikuspuntua» kontatu ziola: «Ikusmira dute Ormuzko itsasartean zer gertatuko». Nabigazioa bermatzeko «behar den plangintza praktikoa eta diplomatikoa» izan zuten hizpide lehen ministroak eta presidenteak, eta «gaitasun militarrei» eta «logistikari» ere erreparatu zieten. ESPAINIAK EZINGO DU PARTE HARTU GAZAKO SU ETENA GAINBEGIRATZEKO ZENTROAN, ISRAELEK HALA ESANDA «Israelen kontrako jarrera agerikoa» argudiatuta, Israelgo Atzerri Ministerioak ohar bidez jakinarazi du Espainiari ez diola utziko parte hartzen Gazarako su etena gainbegiratzeko zentroan, CMCC Koordinaziorako Zentro Zibiko-militarra delakoan. Halaber, Benjamin Netanyahu Israelgo lehen ministroak «etenik gabe» Israelen kontra aritzea leporatu dio Espainiari: «Ez dut toleratuko hipokrisiarik eta etsaikeriarik», esan du sareetan zabaldu duen bideo batean.