Onetik eta txarretik izan du Realak gaur gauean Gironan (Herrialde Katalanak) hutsean berdindu duen partidak. Onetik, Imanol Alguacilek entrenatutako taldea nor baino nor gehiago aritu dela Espainiako Lehen Mailako bigarren sailkatuarekin. Haren zelaian egin du, gainera. Meritu handia du horrek. Emaitzan ez ezik, jokoaren beste zenbait alorretan berdindu dute. Biek izan dituzte oso aukera garbiak gola egiteko, baina ez dute asmatu atearen aurrean: Gironan, Yangel Herrerak; eta Realean, Brais Mendezek. Bietan atezainak bikain aritu dira. Biei ere gol bat baliogabetu diete jokoz kanpo egoteagatik: Gironan, Yangel Herrerari; eta, Realean, Oiartzabali. Azkenean, berdindu egin dute. Baina neurketak ere izan du txarretik Realarentzat, hiru jokalarik hartu baitute min: Odriozola hasi eta berehala lesionatu da; Becker, bigarren zatia hasi eta gutxira; eta, Oiartzabal, luzapenean. Hirurek utzi behar izan dute zelaia. Kezkagarria da, talde txuri-urdinak hiru egun eskas barru jokatuko baitu berriro. Gainera, oso neurketa garrantzitsua da: Mallorcan (Herrialde Katalanak) ariko da astearte gauean, Espainiako Kopako finalerdietako joaneko partidan. Ikusteko dago hiru jokalari horietatik zenbat osatuko diren norgehiagoka horretarako. Egoera ikusita, Imanolek izugarri eskertuko du gaur Afrikako eta Asiako kopetan gertatutakoa. Malik eta Japoniak agur esan dute final-laurdenetan; beraz, Realeko entrenatzaileak nahi izanez gero, Hamari Traorek eta Take Kubok Mallorcaren aurka joka dezakete. Berri oso ona da. Ikusteko dago zer-nolako sasoia duten, baina taldeak edozeinen laguntza eskertuko du.

UAGA Arabako nekazarien sindikatuak protesta deitu du hilaren 7rako Gasteizen, Bizkaiko EHNEk eta ENBAk hilaren 9rako Bilbon deitutakoaren antzera.

Ez lehenengo aldiz, eta, ziurrenik, ezta azkenekoz ere. Hamaikagarrenez, gidoi bertsua duen pelikula ikustea egokitu zaie gaur Mendizorrotzako jarraitzaileei. Besteak beste, irabazteko merituak egin arren, galdu egin baitu Alavesek, Bartzelonaren aurka (1-3). Harmailak goraino beteak zirelarik, partida duina jokatu du Luis Garcia Plazaren taldeak, eta gutxienez puntu bat eskuratzeko moduko lana osatu du. Erritmo eta intentsitate izugarria oinarri hartuta, hustu egin dira etxeko jokalariak, baina ez dute aski izan Bartzelona ahaltsua garaitzeko. Lauzpabost aukera on izan dituzte, baina soilik behin asmatu dute ate aurrean, eta hortxe egon da aldea. Izan ere, Alavesen areara gerturatu bakoitzean gola sartu dute kataluniarrek. Kalitatea erabakigarri gertatu da, beraz. Hala, bolada ona amaitu zaie gasteiztarrei, ezin izan baitute laugarren garaipena jarraian lortu. Ideiak oso garbi zituela zelairatu da Alaves lehen zatian. Erritmo itogarria ezarri du lehen minututik, eta horri aurre egin ezinda ibili da Bartzelona. Presioa goi-goian egin du etxeko taldeak, eta baloi ugari berreskuratu ditu. Bere zelaian preso edukiarazi du Xavi Hernandezen taldea. Ondorioz, gol aukera bat baino gehiago izan ditu Alavesek, baina ez du asmatu. Bada, lehen ordu laurdena igarota parekatzen hasi dira kontuak. Oinetan gehiago izan du baloia Bartzelonak, eta eroso sentitu da aurkariaren zelaian jokatuta. Gero eta hobeto sentitzen hasi dira kataluniarrak, eta 22. minutuan jaso dute saria. Gundoganen pasea baliatuta, maisuki egin du 0-1ekoa Lewandowskik. Golaren ondoren, testuinguru egokia izan du Bartzelonak nahi zuen jokoa egiteko, eta minutu erosoak izan ditu gerora. Baloia batetik bestera mugitu du etengabe, eta lasterka ibili beste erremediorik ez dute izan etxekoek. Halere, sakontasunik gabe ibili dira kataluniarrak. Alaves bera ere ez zegoen hain deseroso egoera horretan, eta pixkanaka egoera iraultzen hasi da. Berriro ere presioa oinarri hartuta, behin eta berriz hurbildu da aurkariaren atera, eta 35.ean sekulako aukera huts egin du Guridik. Luis Riojaren erdiraketa buruz errematatu du azpeitiarrak, eta Iñaki Peña atezainak atepetik atera dio baloia. Itxaropenaren gola Bigarren zatiari berdintsu ekin diote bi taldeek, eta epaileak txistua jo orduko izan du lehen gol aukera garbia Alavesek. Luis Riojak kanpora bidali du baloia atezainaren aurrean bakarrik zela. Bada, hurrengo jokaldian iritsi da 0-2koa, kontraeraso moduko batean. Jokaldi polita osatu ondotik, gol ederra sartu du Gundoganek. Mendizorrotzako jarraitzaileak kolpe baten isildu dira golaren ondorioz, baina, ustekabean, hortik minutu batera itxaropenaren gola egin du Samuk. Alex Solak jokaldi distiratsua egin du eskuin hegaletik, eta haren erdiraketa ez du alferrik galdu aurrelariak. Jokalariak ez ezik, zaleak ere piztu dira ederki, baina minuturik zailenetan eskarmentua erakutsi du Bartzelonak. Lehentasuna eman dio baloia oinetan izateari, eta pixkanaka apalduz joan da etxekoen freskotasuna, nekearen ondorioz. Berriz ere intentsitatea ezartzeko asmoz, aldaketak goiz xamar egin ditu Alavesek, baina justu orduantxe iritsi da 1-3koa, Victor Roquek egina. Kolpe latza izan da gola etxekoentzat, eta horri buelta eman ezinda ibili dira gerora. Bartzelona hamar jokalarirekin geratu izana ere ez da pizgarri izan Luis Garcia Plazaren taldearentzat. Eta, azkenean, luze egin zaio lehia.

Bakoitza berean, baina borrokarako prest daude bai Iñaki Artola eta Ander Imaz, bai Joseba Ezkurdia eta Xabi Tolosa. Baikokoak bete-betean ari dira lehian bigarren izateko eta finalerdietako ligaxkarako zuzenean sailkatzeko. Gaur, seigarrenez jarraian irabazi dute: 22-12 hartu dituzte mendean Aitor Elordi eta Beñat Rezusta, Idiazabalen (Gipuzkoa). Hirugarren dira sailkapenean, zortzi garaipenekin. Berdinduta daude Peio Etxeberriarekin eta Jose Javier Zabaletarekin, baina Aspekoak aurretik daude tanto aldeari esker. Sekulako lehia dute elkarren artean, eta buruz buruko hori amaieraraino luzatuko da, bi bikoteek elkarren aurka jokatuko baitute azken jardunaldian, Iruñean, Labriten. Lehen itzulian, Artola eta Imaz nagusitu ziren elkarren artekoan, Tolosan (Gipuzkoa): 22-21. Elkarren arteko borroka estuaren erakusgarri da. Konfiantzaz gainezka daude alegiarra eta oiartzuarra. Gaur, behetik gora eginda irabazi dute. Elordi eta Rezusta nagusi izan dira hasieran (6-3); lehia parekatu egin da gero (10-10); baina, hortik aurrera, Artola eta Imaz oso nagusi izan dira. Arnasa pixka bat Ezkurdiak eta Tolosak, berriz, azkeneraino borrokatu nahi dute. Gaur, laugarren garaipena lortu dute: 22-13 irabazi diete Jon Ander Peñari eta Jon Ander Albisuri, Labriten. Aspekoak hasi eta buka nagusitu dira. Sendo aritu dira, baina mesede handia egin die aurkariak ezinean aritu direla. Makina bat huts egin dituzte Peña II.ak eta Albisuk. Gaur irabazita, kanporaketarako sailkatzeko itxaropenari eusten diote arbizuarrak eta anoetarrak. Hiru bikote dituzte garaipen bakarrera: Peña II.a eta Albisu, Jokin Altuna eta Julen Martija —partida bat gutxiago jokatu dute—, eta Elordi eta Rezusta. Aurreneko biekin galdua dute tanto aldea. Aldiz, Elordik eta Rezustak baino hobea dute. Ataka estuan daude oraindik ere, partida guztiak irabazi beharrean, baina gaurko garaipenak arnasa pixka bat eman die. Bihar bukatuko da hamabigarren jardunaldia. Erik Jakak eta Iosu Eskirozek —Jon Mariezkurrena ordezkatuko du— Javier Zabalaren —Altuna III.a ordezkatuko du— eta Martijaren aurka jokatuko dute Donostian. Irabazten badute, Baikokoek lehen postua ziurtatuko dute. Aspekoek, berriz, lasaitasuna eman diezaiekeen garaipena lortu nahi dute.

Pedro Sanchez Espainiako Gobernuko presidenteak iragarri duenez, Ministroen Kontseiluak lanbide arteko gutxieneko soldata % 5 igotzea onartuko du datorren asteartean, hilean 1.134 euroraino, Lan eta Gizarte Ekonomia Ministerioak eta sindikatuek urtarrilean lortutako akordioaren ildotik.

Iberiak ‘handling’ enpresa bat sortzea adostu du sindikatuekin lan-gatazkari amaiera emateko.

Athleticek nagusitasunez menderatu du Mallorca, gol festa bat izan den norgehiagokan (4-0). Zuri-gorriek seigarren garaipena egin dute jarraian San Mamesen, eta asteazkenean Atletico Madrilen aurka duten Kopako kanporaketaren joaneko partidara era onenean iritsiko dira. Yuri izan da partidako jokalari nabarmenduena, 15 minutu eskasean egin dituen bi gol ederrekin. Hirugarrena Guruzetak egin du, eta laugarren Iker Muniainek. Ezin izan da partida modu hobeagoan hasi Athleticentzat. Nico Williamsek jarri du erdiraketa, eta Yurik, bira eginez, ezkerrarekin errematatu du, bizkarrez ate aldera, Rajkovicen ate barruan baloia sartzeko. Lehen iritsiera eta lehen gola. Agirreren plana hasi eta berehala erori da goitik behera eta Mallorcari laster egokitu zaio jokoa proposatzea. Baina Yuriren lehen gola eta 10 minutu geroago, bigarrena iritsi da. Geldikako beste ekintza batean, oraingoan izkinetik, Nikok erdiraketa egin, Guruzetak orpoz luzatu du eta Yurik oinaren barnealdea sartu du baloia eskuadrara bidaltzeko. Beste gol eder bat alboko defendatzailearena. Mallorcak gehiegi aldatu behar zuen bai bere jarrera baita joko proposamena ere, etxeko taldeari gutxienez kilimak egiteko. Baina Athletic handitu batek ez dio aukerarik eman, eta bereak egin ditu lehen zatiko arrisku egoera guztiak. Eta buruarekin jokatu du Athleticek, abiadura eten du, eta nagusitasunez egin da baloiaren jabetzarekin. Agian markagailuak adierazten zuena baino parekatuagoa izaten ari zen norgehiagoka, baina bi areatan ez du hutsik egin Athleticek. Jokalari nabramendu gehiago egon dira etxekoen artean Zarauzko defentsaz gain. Beñat Pradosek, batez ere, erakustaldia eman du zelai erdian, bai baloi irteeran, eta baita baloirik gabeko akzioetan. Williams anaiak protagonistak Gidoi berbera jarraitu du partidak bigarren zatian ere. Athletic nagusi duelu gehienetan, eta azkar erasotzen bi hegaletatik Williams anaien bitartez. Izan ere bi jokalarien oinetatik atera dira jokaldi esanguratsu gehienak. Baina ordaindu egin dituzte egindako ahaleginak, eta lehenik Nico, eta ondoren Iñaki, aulkira joan behar izan dira min hartuta. Oraindik goiz bada ere, zalantza hor egongo da Atletico Madrilen aurkako partidara iristen diren jakiteko. Bide beretik jarraitu dute zuri-gorriek, eta partida ixteko gola egin dute. 63. minutuan izan da hori, kontraeraso bikaina osatu ondoren. Nicok area ertzeraino gidatu du, Iñakiri egin dio pasea, eta honek erdiraketa jarri dio Sanceti. Erdilari nafarrak ez du asmatu baloia errematatzen, baina bere ukitua Guruzetak jaso du gola nahierara egiteko. Begibistaz jokoz kanpoko jokaldia zirudien, baina VARak gola adierazi du. Partida biribiltzeko, kapitainak egin du laugarren eta azken gola. De Marcosek erdiraketa zorrotza egin du eskuin hegaletik, Athleticeko jokalari batek irrist egin du eta Iker Muniain agertu da, markarik gabe, oinaren barrualdearekin nahierara errematatzeko penalti puntuan. Biguna, baina doitua, ezinezkoa Rajkovicentzat.

Ahal Dugu-k Miren Gorrotxategi lehendakarigai gisa berretsi duen egun berean jakinarazi dute Sumar Mugimenduak, Ezker Anitza-IUk eta Berdeak-Equo taldeak akordioa egin dutela lehendakarigai bakarrarekin lehiatzeko Eusko Legebiltzarrerako hauteskundeetan. Bihar bertan plazaratuko dute akordio horren edukia, eta, hautagai bakar horren izena ematea espero da. Sumarreko Alba Garcia, Ezker Anitza-IUko Jon Hernandez eta Berdeak-Equo alderdiko Carmen Muñoz egongo dira, hau da, talde horiek aurkeztu dituzten lehendakarigaiak. Litekeena da Garciaren aldeko apustua eszenaratzea ekitaldi horretan. Eusko Legebiltzarrean gaur egun Elkarrekin Podemos-IUk ordezkatzen duen esparru politiko horren beste subjektu nagusiak, Ahal Dugu-k, bere primarioen emaitzak ezagutarazi dituen egun berean iritsi da beste taldeen akordioa, kontraprogramazio baten modura. Edonola ere, Ahal Dugu-k aurkeztu ditu Eusko Legebiltzarrerako hauteskundeei begirako primarioen emaitza horiek, eta Miren Gorrotxategi berretsi lehendakarigai gisa. Militanteen %93,5en babesa jaso du. Horrenbestez, Gorrotxategi izango da Bizkaiko zerrendaburua, David Soto Gipuzkoakoa, eta Guillermo Presa Arabakoa. Primarioen fasea amaitutzat emanda, Gorrotxategik hauteskunde kutsu beteko ekitaldia egin du arratsaldean Durangon, hainbat alderdikidek babestuta. Jone Belarra Podemoseko idazkari nagusiak ireki du ekitaldia: «Badaukazue lehendakarigaia», esan du. Horrenbestez, oso zaila ematen du Sumarrekin irekita dauden negoziazioek fruiturik ematea, are gutxiago azken orduko akordioaren ondoren. Belarraren ostean, Pilar Garrido EAEko Ahal Dugu-ko buruak hartu du hitza, eta esan alderdi horrek ordezkatzen duela hobekien ezkerra. Pantaila handian ikusi eta entzun ahal izan dira bi buruzagiak, eta Gorrotxategik berak hartu du hitza gero. Esan du ilusio handiz helduko diola erronkari. Nabarmendu du Ahal Dugu-k arlo publikoa defendatuko duela beti pribatizazioen aldean. «Ez nintzen politikan sartu bankariei politikariei baino gehiago agintzen uzteko, baizik eta ezinezkoa ematen duena posible egiteko proiektu bat badagoelako». EITB Focus inkestak emandako datuei erreferentzia eginez, uste du saritu egin duela alderdi moreak Eusko Legebiltzarrean egindako lana, eta lan horretan jarraitzeko prest agertu da. «Gaur inoiz baino gehiago, posible da aldaketa, eta aldaketa horretan ezinbestekoak gara». Bildutakoen txalo artean amaitu du ekitaldia, Sumarrekin abiatutako negoziazioei aipurik egin gabe. Handik ordu gutxira heldu da ezkerreko esparru horretako gainontzeko taldeen akordioa. Itun horrek are gehiago indartu du esparru horretan bi lehendakarigai lehiatuko direlako tesia. Itxaso Gipuzkoako zerrendaburu Bien bitartean ari da argitzen gainerako alderdien zerrendetan nor egongo den. Gaur jakinarazi dutenez, Denis Itxaso Espainiako Gobernuak EAEn duen ordezkariak kargu hori utziko du, PSE-EEko Gipuzkoako zerrendaburu izango baita. Bizkaikoa Eneko Andueza izango da; eta Arabakoa Aroa Jilete. Bestalde, EH Bilduk Pello Otxandiano Araban aurkeztuko du zerrendaburu gisa, eta Nerea Kortajarena izango da Gipuzkoako zerrendaburua. Eusko Legebiltzarrerako hauteskundeak apirilean egingo direla diote zenbait politikarik eta hedabidek zabaldutako mezuek, eta horietara aurkezteko asmoa duten alderdi eta koalizioak lanean ari dira. Eskumena, baina, Eusko Jaurlaritzako lehendakari Iñigo Urkullurena da, eta hark ez du informazio askorik eman nahi, eta esana du badituela oraindik legealdia amaitu aurretik bete beharreko konpromisoak. Zehazki, legebiltzarrean martxan diren legeen tramitazioa eta zenbait eskumenen transferentzia. Legealdi amaiera Argitzeko dago oraindik hauteskundeak noiz izango diren. EH Bilduko eledun Nerea Kortajarenak horri buruz galdetu dio Urkulluri Eusko Legebiltzarreko kontrol saioan, galdera «interes orokorrekoa» dela iritzita. Urkulluren esanetan, hiru irizpide erabiliko ditu erabaki hori hartzeko: gobernu programa betetzea, «hurrengo lehendakariari eta gobernuari ahalik eta legaturik onena uztea» eta gizartearen «interes orokorra defendatzea». Era berean, azpimarratu egin du aurrerantzean ere Gernikako Estatutua betetzeko beharra. Zehazki, PSOEk eta EAJk azaroan adostu zuten moduan, legealdia amaitu aurretik Eusko Jaurlaritzaren esku nahi ditu migrazioen, aldiriko trenen kudeaketaren eta tituluen homologazioaren eskumenak. «Legealdia ez da amaitzen azken eguna iritsi arte».

Eusko Jaurlaritzako lehendakari Iñigo Urkulluk Urdaibaiko Guggenheimen inguruko bi urteko hausnarketa epe bat iragarri eta haren «bideragarritasuna» hizpide hartu izanak «nahasmena» eragin dute biosfera erreserban egin nahi den proiektu horren inguruan, EH Bilduko legebiltzarkide Jasone Agirrek azaldu duenez. Hala, Eusko Legebiltzarreko kontrol saioa baliatu dute koalizio subiranistak eta Elkarrekin Podemos-IUk Urkulluri eskatzeko argitu dezala Jaurlaritzak zer ikuspegi duen proiektuaz. «Urdaibairi eta Busturialdeari benetako bultzada bat ematearen aldekoa» dela erantzun du lehendakariak, eta gehitu Urdaibaiko Guggenheim horretarako baliagarria izan daitekeela. Urkulluk garrantzia kendu die urtarrilaren 22an egin zituen adierazpenei. Hau da, Urdaibaiko Guggenheimen «bideragarritasuna» aztertu behar dela esan izanari, eta argudiatu du abendutik ez dela aldaketarik izan museo hori eraikitzearen inguruko planetan. Hala, beste gai bat hartu nahi izan du ardatz: EAJk eta PSE-EEk Busturialdea suspertzeko plan bat gauzatzeari buruzko legez besteko proposamen bat aurkeztu izana. Urtarrilaren 26an aurkeztu zuten, gaiaren inguruko eztabaida betean. Testu hark industriari, lehen sektoreari zein saneamenduari eta ur hornidurari erreparatzen die, baina baita «kultur sektorearen dibertsifikazioari» ere, nahiz eta ez duen hortik harago jotzen. Hain zuzen, urtarrileko agerraldi hartan, Urkulluk azken arlo horri ere erreparatu zion, Guggenheimen inguruan galdetuta, eta museo hartatik harago jo beharra zegoela adierazi zuen, eta kontuan hartu behar direla beste baliabide batzuk ere: Santimamiñeko koba, Urdaibai dorrea, Gernikako Batzar Nagusiak… Gaurkoan, baina, ukatu egin du hitz haiekin museoaren bideragarritasuna kolokan jarri izana, eta adierazi du hark «bat egin» dezakeela suspertze planarekin: «Nik ez dut ez baieztatu, ez ezeztatu, ez zalantzan jarri». Beraz, Urkulluk azaldu du bi erakunde horiek helburu bikoitza dutela gaiaren inguruan. Batetik, «2024ko errealitateari atxikitako» plangintza estrategiko bat osatzea da, Eusko Legebiltzarrak legez besteko proposamena onartu ostean abiatuko dutena, haren esanetan: «Uste dugu biosfera erreserba bat izanik, berariaz landutako plangintza bat behar duela». Bestetik, Bilboko Guggenheim museoko patronatuak ─haren parte dira Jaurlaritza eta aldundia─ onartutako 2024-2025erako plan estrategikoa betetzea. Hain zuzen, Urkulluk azaldu du plan hartan eta Jaurlaritzak onartutako Kultura 2028 plan estrategikoan jasotakoek markatuko dutela bidea. Hau da, museoa zabaltzearen inguruko gogoetan jarraitu eta «egitasmoaren oinarri zehatzak jartzea». Horiek hala, Urkulluk azaldu du orain «analisi konpartitu bat» osatzeko abagunea dela. Analisi hori, baina, modu zabalagoan planteatu du. EAJren eta PSE-EEren proposamenaren bidetik, «ekonomia eta industria dinamizatzea eta dibertsifikatzea», «nekazaritza, abeltzaintza eta arrantza baliabideen aprobetxamendu iraunkorra bermatzea» eta «turismoaren kontrola eramatea» jarri ditu helburutzat. Hori bai, esan du litekeena dela Urdaibaiko Guggenheim egotea plan hori garatzeko «trakzio lana» egin dezaketen proiektuen artean. Etorkizuna jokoan Aferaz oso bestelako ikuspegia dute EH Bilduk eta Elkarrekin Podemos-IUk. Agirrek adierazi du Busturialdea «amatatzen» ari dela, EAJ eta hark gidatutako instituzioak Guggenheimera so dauden bitartean. Salatu du «industria galtzen eta enpresak ixten» ari direla, eta lehen sektorean ere lanpostuak galdu direla: «Gai delikatua da, alderdikerien gainetik, euren etorkizuna dagoelako jokoan». Horiek hala, Agirrek adierazi du «aspalditik» datorren arazo bat dela eskualde hark duena, eta «berehalako» erantzun bat behar duela. Aspaldiko arazoa, Agirreren esanetan, Urdaibaiko biosfera erreserba babesteko eta antolatzeko legea 1989an onartu zelako, eta hark ezarri arren bi urteko epean onartu behar zela eskualdeko jarduera sozioekonomikoak garatzeko programa, hura ez zelako iritsi 1998ra arte. Eta ordutik ere, «ezer gutxi» egin dela salatu du legebiltzarkideak. Hala, haren ustez, orain EAJk eta PSE-EEk legez besteko proposamen bat aurkeztu izanak «herritarren begirada beste nonbaitera» zuzentzeko helburu bati erantzuten dio, eta ez eskualdea suspertzekoari: «Ke hutsa da?» Horren ordez, 1998an ezarritako bideari berrekitearen alde egin du, «hasieratik» ekiteko beharrik gabe. Hori bai, zehaztu du beste modu batera egin behar direla gauzak, herritarrak kontuan hartuta: «Ezinean ari zarete. Zuen gobernatzeko ereduak pot egin du. Zaharra da, iraungita dago, eta herritarrak hori ordaintzen ari gara». Informazio falta Gorrotxategiren esanetan, berriz, EAJk adituek eta herritarrek esanak entzun gabe egin nahi du aurrera Urdaibaiko Guggenheim eraikitzeko proiektuarekin, modu «ez-demokratiko» batean egin ere: «Informazioa ukatzen eta ezkutatzen da». Hala, proiektuaren aurka egiteko argudioak zerrendatu ditu. Gogoratu du babes bereziko biosfera erreserba batean museo bat eta jatetxe bat eraikitze hutsak eremuan «eragin larria» izan dezakeela. Era berean, proiektuaren eskaintza kulturala eta ekonomikoa kritikatu ditu. Lehenari dagokionez, azaldu du Araba, Bizkai eta Gipuzkoan badirela halako proposamenak eskain ditzaketen beste proiektu batzuk; hala nola Bilboko Guggenheim bera. Alde ekonomikoari so, berriz, adierazi du eskualde hark badituela beste premia batzuk ─«arrantzaren egoera, garraio sare eskasa…»─, diru publikoa «masa turismoa sustatzeko» bideratzea baino garrantzitsuagoak direnak. Ez da «erraza» Urkulluk eta Elixabete Etxanobe Bizkaiko Foru Aldundiko ahaldun nagusiak urtarrilaren 22an egindako prentsaurrekoak adierazpen andana eragin ditu azken asteetan. Egun hartan bi politikariek azaldu zutenez, Busturialdeak «garapen sozioekonomikorako eredu propio» baterako beharra du, eta, jarraian, kazetarien galderei erantzunez, hor Guggenheim museoak izan dezakeen lekuaz aritu ziren. Zehazki, azaldu zuten bi urteko «hausnarketa» epe bat irekiko zuela Bilboko Guggenheim museoko patronatuak. Horrekin batera, baina, Urkulluk proiektuaren bideragarritasuna izan zuen hizpide. «Bere bideragarritasuna aztertu behar da, balioan jarri behar dira egindako azterketak, ea egingarria den ala ez», esan zuen, hitzez hitz. Eta ez behin bakarrik: «Aztertu behar da ideiaren bideragarritasuna, proiektua egingarria ote den». Azkenik, adierazi zuen ez dela «erraza» aferaren inguruko jarrera jakin bat izatea, ez dituelako ezagutzen «eraikuntza proiektua» eta haren kudeaketarako asmoak. Horrek EAJko kideen erreakzio sorta ekarri zuen. Besteak beste, Andoni Ortuzar EBBko presidenteak, Itxaso Atutxa BBBko buruak eta Imanol Pradales EAJren lehendakarigai eta Bizkaiko Foru Aldundiko Azpiegitura diputatuak adierazi zuten proiektuaren alde daudela. Leixuri Arrizabalaga Bizkaiko Aldundiko eledunak, berriz, adierazi zuen Urkulluk berak eman beharko lituzkeela bere esanen inguruko «azalpenak». Gaurkoan hala egin du.

Etxetresnak eta sakelakoak konpontzeko eskubidea aitortu eta bultzatuko du Europar Batasunak. Europako Parlamentuak eta 27 estatuek akordioa lortu dute, baina Ganberak eta Kontseiluak eman behar diote babesa.