Robert Fico Eslovakiako lehen ministroa tirokatu dute gaur. Eslovakiako Handlova hirian gertatu da tiroketa, Bratislava hiriburutik 150 bat kilometrora. Eslovakiako TA3 telebistaren arabera, ustezko tiro egilea atxilotu dute, 71 urteko gizonezko bat. Poliziak ez du erasoaren inguruko azalpen gehiagorik eman. Lehen informazioaren arabera, bost tiro eman dizkiote Ficori sabelean, eta oso larri eraman dute erietxera. Defentsa ministroak jakinarazi duenez «ebakuntza zail bat» egiten ari zaizkio bertan. Lekukoen arabera, hainbat tiro entzun ziren, eta jarraian lehen ministroa lurrera erori zen. Segurtasun arduradunek lehen ministroaren autoan sartu zuten berehala Fico eta erietxera eraman zuten. Gobernuburua hirian bildutako jendea agurtzera gerturata zen tiroak entzun zirenean. Erietxeko iturrien jakinaraz zutenez, gobernuburua konortedun zegoen heldu zenean. BBC komunikabideak jakinarazi duenez, Eslovakiako jarduneko presidente Zuzana Caputova «txokaturik» agertu da eraso «bortitz eta krudel» hori dela eta. Gisa berean iharduki dute Europar Batzordeko buruak, Ursula von der Leyenek; Errumaniako lehen ministroak, Marcel Ciolacuk; Txekiar Errepublikakoak, Petr Fialak; Hungariakoak, Victor Orbanek; eta Erresuma Batukoak, Rishi Sunakek. Güvenlik, yaralı Slovakya Başbakanı’nı kaldırıp (ayaklarını yerden kesip) arabaya sürüklüyor… Robert Fico’ya saldırı ilk görüntü.. Böyle son dakika işlerini çok paylaşmam, fakat hedef “Ukrayna savaşının gereksiz” olduğunu söyleyen bir politikacıysa… pic.twitter.com/StC1klJn6Q — Ahmet Yeşiltepe (@ahmetyesiltepe) May 15, 2024 Ficorena da 2003az geroztik Europako gobernuburu baten kontra egiten duten lehen atentatua —2003an Zoran Dindic Serbiako lehen ministroa hil zuten—. 2005ean, Georgian gizonezko batek granada bat bota zuen Mikhail Saakaxvili presidentea eta AEBetako estatuburu George Bush parte hartzen ari ziren ekitaldi batean, baina eszenatokitik urrun erori zen, eta ez zen lehertu. Bush eta Saakaxvili onik irten ziren. Populista Fico joan den iraileko hauteskundeen ondoren itzuli zen lehen ministroaren kargura, koalizio pupulista-nazionalista baten zerrendaburu gisa aurkezturik. Smer-SDD ezkerreko alderdiko burua da, eta hauteskundeak irabazi berri ditu esanez irabaziz gero Eslovakiak ez ziola Ukrainari gehiago arma laguntzarik bidaliko. Baina ukatu izan du errusiazalea dela. Horrez gain, Mendebaldeak Errusiaren aurka hartutako neurriei buru egiteko prest agertu da. Inork ez du esan, haatik, gaurko tiroketak iritzi horiekin loturarik duenik. Eslovakiako presidente hautatu eta Ficoren aliatu Peter Pellegrinik erran du «laztua» zela «iritzi politiko ezberdin baten aurkako gorrotoak noraino eraman dezakeen ikusirik». 2018an, lehen ministroaren kargua utzi behar izan zuen Ficok, Jan Kuciak ikerketa kazetariaren erailketaren ondotik. Langile familia batean sortu zen Fico, 1964an. Ofizioz abokatua da. Ibilbide politikoa Alderdi Komunistan hasi zuen, 1989ko Belusezko iraultza aitzin, Txekoslovakia ohian. 1994. eta 2000. urteen artean, Eslovakiaren ordezkari egon da Europako giza eskubideen auzitegian. Smer-SD alderdia 1999an sortu zuen, Ezker Demokratikoak proposatu zion ministro kargu bat ukatu ondoren. Smer alderdiarekin garaipen handia lortu zuen 2006ko hauteskundeetan, eta lehen ministro bilakatu zen, lehen aldiz. Eslovakia bi urte lehenago sartu zen Europako Batasunean. 2012an berriz irabazi zituen bozak, ustelkeria salaketa baten ondorioz zentro-eskuineko koalizio batek galdu ondoren. 2016an berriz ere garaile atera zen, baina bi urteren buruan kargua utzi zuen, Kuciak kazetariaren eta haren bizilagunaren erailketaren ondotik. Joan den urrian itzuli zen lehen ministroaren postura. Leporatu zaizkion ustelkeriak betidanik ukatu ditu. The Guardian-ek dioenez, Ficok Errusiako presidente Vladimir Putin miresten du, eta errana luke ezen nazioarteko atxilotze agindu bat balitz Putinen aurka, Eslovakiara joanez geroz, ez lukeela utziko atxilotzen. Hungariako gobernuburu Viktor Orbanen alde ere mintzatua da, Moskuren gertukoa hura ere. Taktikalari trebetzat daukate adituek Fico. Nagusi diren jarrera europazaleen eta Mendebaldearen aurkako ele nazionalista zorrotzen arteko joko abila erabili duela diote. Immigrazioaren kontrakoa da, eta, diotenez, diskurtso horrekin irabazi zituen 2016ko hauteskundeak. Komunitate musulmanaren kontrako eleak ere izan ditu. Ez hori bakarrik. Sexu berekoen ezkontzaren aurka agertu da Fico. COVID-19aren pandemia denboran maskaren erabiltzearen, konfinamenduaren eta txertatzearen kontra aritu zen. Urte hastapenetik, protestak piztu dira Eslovakian. Izan ere, otsailean, legebiltzarreko diputatuek ustelkeria kasuentzat plantan zegoen fiskaltza bereziaren bulegoa kentzea bozkatu zuten, eta diru-ustelkeria zigorren arintzea erabaki. Horrez gain, sexu-bortxaketa aferetan preskripzio epeen laburtzea erabaki zuten. Apirilean, Eslovakiako gobernuak irrati-telebista publikoaren ordezkatzeko neurria aurkeztu du. Oposizioak azkarki kritikatu du neurria, erranez gobernuak irrati eta telebista publikoen kontrola hartu nahi zuela. Apirilean, Peter Pellegrini Ficoren hurbilekoak irabazi zituen lehendakari hauteskundeak. Eslovakiako lehen emakume lehendakaria zenaren lekua hartuko du ekainean, Zuzana Caputovarena. Iaz, Caputovak jakinarazi zuen ez zela berriz aurkeztuko, eta heriotza mehatxuak ukan zituela.

Gehiengo sindikalak Kongresuan Hego Euskal Herriak enplegu publikoa “betorik” gabe erabakitzea eskatu du

Makina-erreminta sektorearen fakturazioa % 22,6 hazi zen 2023an, “marka historikoa”

Araba eta Gipuzkoako nekazarien elkarteek bat egin dute ekainean Frantziako mugan egingo den mobilizazioarekin. Hamabost elkarte baino gehiagok “bloke bateratua” sortu dute, Europako nekazaritza-sektorearen mesederako “neurri eraginkorrak” aldarrikatzeko.

Alaves bolada onean zen. Lau partida zeramatzan galdu gabe, eta ondo jokatuta. Baina eten da bolada, 5-0 galdu baitu Real Madrilen aurka, Bernabeun. Luis Garcia Plazak ondo ekin dio neurketari. Baina Real Madrilek egin du lehen gola, eta hortik aurrera oso nagusi izan da. Alaves saiatu da, ez du partida txarra egin. Baina ezin izan dio aurre egin egungo liga txapeldunari. Partida hasi aurretik, Real Madrilek liga titulua eskaini die zaleei. Alavesek ondo ekin dio norgehiagokari, eta lehen hamar minutuetan bi aukera argi izan ditu gola egiteko. Baina Omorodionek ez du asmatu. Presio estua egin du Alavesek, eta hortik iritsi dira aukerak. Baina 10. minutuan gola egin du Real Madrilek. Carlo Ancelottik zuzentzen dituen jokalariek jokaldi ona lotu dute. Baloia Krossi ailegatu zaio. Hark erdiraketa ona egin du, eta Bellinghamek, ia angelurik gabe, punpa laster errematatu du. Baloia, zori apur batekin, sareetara joan da. Hortik aurrera Real Madril oso nagusi izan da. Baloi jabetza izan du, eta partidari erritmo handirik jarri ez arren, erraz mugitu du. Horri esker zuloak topatu ditu Alavesen defentsako egituran. Nahi eta ezin aritu da Arabako taldea. Are gehiago Real Madrilek aldea handitu duenean. Bigarren gola Viniciusek egin du. Bellinghamek pase bikaina eman dio Camavingari lerro artean. Atzera pasea eman, eta brasildarrak baloia bultzatu besterik ez du egin behar izan. 28. minutua zen. Maldan gora zuen partida Alavesek. Baina ez du amore eman, eta Gorosabel gola egitear egon da. Baina ez du lortu. Bai, ordea, Real Madrilek, lehen zatia amaitzear zela. Valverdek erremate ikusgarria egin du urrutitik, eta Owonok ezin izan du ezer egin. Joan-etorriko partida 3-0ekoarekin partida ia erabakita zegoen, eta ireki egin da. Hala, bigarren zatiko lehen ordu laurdenean gola egiteko aukerak izan dituzte bi taldeek. Baina atezainak agertu dira. Courtoisek Omorodionen eta Hagiren ahaleginak zapuztu ditu, bi gelditu onekin. Owonok, berriz, gelditu ona egin dio Rodrygori. Joan-etorriak etengabeak izan dira. Ondo aritu da minutu horietan Alaves, Real Madrilekin nor baino nor gehiago lehiatuz. Emaitza ikusita, hori zen helburua. Bigarren zati horretan Real Madrilek presarik gabe jokatzen jarraitu du. Baina aurreko hiru jokalarietako batek baloia jasotzen zuenean, beste abiadura bat ematen zion. Hala, Valverdek, Gullerrek eta Bellinghamek lotutako jokaldi bat, gol ikusgarri batekin biribildu du Viniciusek, 73. minutuan: 4-0. Gertu izan du bosgarrena ia segidan, baina berriro ere Owono azaldu da Rodrygoren aurrean. Alavesek lanean jarraitu du, eta izan ditu pare bat aukera gutxienez gola egiteko. Merezi zuen. Baina ez da posible izan. Etxekoen festa biribiltzeko, gainera, Gullerrek bosgarrena egin du, aldaratze bat baliatuz (81. min.). Emaitza horrekin bukatu da partida.

Aurreakordioa itxi dute Bilbobusen, eta greba bertan behera geratu da gutxienez ostegunera arte

Osasunak Sadarren irabazi ezinik jarraitzen du. Azken hiru partidak galdu ostean, gaur puntu bakarra lortu ahal izan du Mallorcaren kontra, bana berdindu baitu. Jagoba Arrasatek, bere agurra iragartzeko prentsaurrekoan, adierazi zuen etxean taldeak partida onak egitea nahi zuela, hainbeste maite duten zaleengandik behar bezala agurtzeko. Baina ez da posible izan. Gaur, lehen zati ona egin dute gorritxoek, eta aurretik ere jarri dira, Moncayolaren gol bati esker. Baina bigarren zatian, Mallorca nagusi izan da, eta merezitako berdinketa lortu du. Ruben Peñak bere atean sartu du gol hori. Sei partida daramatza Osasunak Ligan irabazi gabe. Partidaren lehen bi abagune garbiak Mallorcak izan ditu, 11. minutuan. Lehen errematea Nacho Vidalek egin du, eta Aitor Fernandezek gelditu ona egin du. Ondoren Darderrek jaurti du, eta Osasunako atzelariek aldendu dute baloia. Dena den, lehen ordu laurdena betetzear zela jarri da aurretik Osasuna,, 14. minutuan, Moncayolaren gol batekin. Partidaren erritmoa geldoa zen, baina gorritxoek zuten jokoaren ekimena, eta saria jaso dute. Falta jaurtiketa baten ostean aldaratzea erdilariari iritsi zaio, eta erremate on batekin ondo gurutzatu dio baloia Rajcovic atezainari. Sasoi honetan golik jaso sartu gabe zegoen Moncayola. Osasuna hegaletatik saiatu da min egiten, eta barrutik Moncayolarekin eta Raul Garcia de Harorekin hutsuneak topatzen. Berdegunean ondo jarrita, eroso aritu da Jagoba Arrasatek zuzentzen duen taldea. Mallorcak apenas estutu du, Osasunaren presio onari esker ezin izan baitu ohikoa duen joko zuzena egin. 38. minutuan izan du Javier Aguirreren taldeak aukera bakanenetako bat, Catenak egindako akats baten ostean. Baina Larinek kanpora bidali du errematea. Mallorcaren atera gerturatu den jokaldietako batean asmatzea falta zaio Osasunari, norgehiagoka gehiago bideratzeko. Lehen zatia 1-0 amaitu da. Mallorca hobeto Bigarren zatiari begira marrazkia aldatu du Aguirrek. Mascarell kendu, eta Aldon Prats zelairatu du, bi aurrelarirekin jokatzeko. Aldaketa hori erabakigarria izan da gaurko partidan. Lehen minutu horietatik jada Mallorca hobeto egon da, eta gehiago jokatu du Osasunaren zelaian. Lehen aukera Gio Gonzalezek izan du, baina baloiak Osasunaren jokalari baten bizkarrean jo du. Osasunari kostatu egin zaio baloi jabetza izatea, eta neurketaren agintea izatea. Presioan ere ez du hainbeste asmatu, eta atzerapausoa eman du. Dena den, bigarren zatiko lehen aukera gorritxoek izan dute, Iker Muñozek punpa laster egindako jaurtiketa batekin. Errematea ikusgarria izan da, baina baita ere Rajcovicen erantzuna. Ondoren, Ruben Peñak egin du errematea, baina ezin izan du gola egin. Segidan Mallorcaren ahalegina iritsi da, eta Gio Gonzalezen erremate on bat kornerrera bidali du Aitor Fernandezek.Geldikako jokaldi horretan bisitarien gola iritsi da. Ruben Peñak egin du bere atean, 65. minutuan. Kornerra buruz aldendu du Iker Muñozek, baina aldaratzea Mallorcako erdilariari iritsi zaio area ertzean. Errematatu egin, eta Peñari jo ostean sareetara joan da. Aitor Fernandezek ezin izan du baloia ikusi. Golak min egin dio Osasunari, eta Mallorcak nagusi izaten jarraitu du. Are gehiago, bigarren gola sartzear egon da 71. minutuan. Latok aukerako errematea izan du, baina ondo erantzun du Atior Fernandezek. Ondoren, jaurtiketa kanpora joan zaio Toni Latori. Bi aurrelarirekin hobeto moldatu da Agirreren taldea, eta haiek sortutako hutsuneak ederki baliatu dituzte erdilariak atzetik iristeko. Banakoa, dena den, ez da aldatu.

Abian da Eusko Legebiltzarraren hamahirugarren legealdia. Hilabete ere ez da apirilaren 21eko bozak egin zirela, baina Eusko Legebiltzarra eratu da jada. Aurpegi berriz osatutako legebiltzarra izango da, emakumeak eta abertzaleak gehiengo direla. Aurreko hiru legealdietan bezala, Bakartxo Tejeria izango da legebiltzarreko lehendakari, eta beste lau urtez jarraituko du, EAJren eta PSE-EEren babesa eskuratu ondoren. Legebiltzarreko presidentearen hitzetan, martxan jarri den legealdia akordio zabalak izango ditu helburu, eta, «ezinbestez», autogobernu berria. Nolanahi ere, legealdia ika-mika politikoarekin hasi da. EAJk eta PSE-EEk Eusko Jaurlaritza osatzeko berretsi nahi duten ituna baliatu baitute Mahaiaren gehiengoari eusteko. Oposizioari ez zaio gustatu, eta gaitzetsi dute beren eskariak aintzat hartu ez izana. Izan ere, Susana Corcuera sozialista izango da legebiltzarreko lehen presidenteordea. EH Bilduk eskatua zuen kargu hori, EAJrekin batera ordezkari gehien dituen alderdia delako (27). Baina bigarren presidenteordearen ardura izango du Eba Blancok, eta Eraitz Saez de Egilaz izango da bigarren idazkaria. Jon Aiartza jeltzaleak osatuko du. Bilkura amaituta, Nerea Kortajarena EH Bilduren legebiltzarreko eledunak salatu du Mahaiak ez diola erantzuten gizartearen «errealitate politiko eta sozial berriari», eta EAJren eta PSE-EEren arteko akordioa gaitzetsi du, karguak banatzeagatik. «Izaten ari diren elkarrizketa baztertzaile eta sekretuen lehen emaitza aulkien banaketa hau da». Koalizio subiranistaren eledunak azpimarratu du, dena den, EH Bilduk «iparrorratza oso argi» duela; esan du elkarlana eta elkarrizketa sustatuko dituela «erronka garrantzitsuei» erantzun ahal izateko. Laura Garrido PPko ordezkaria ere Mahaiaren eraketaren aurka agertu da. Salatu du ez duela euskal gizartearen aniztasuna ordezkatzen, ez eta legebiltzarraren banaketa ere. Eta gogorarazi du aurreko legealdian Elkarrekin Podemosek ordezkari bat izan zuela Mahaian, egun PPk dituen legebiltzarkideak baino gutxiago izan arren —sei zituen EPk, eta zazpi ditu PPk orain—: «Ez da legealdia hasteko modurik onena», esan du. Tejeriaren mintzaldia ere gaitzetsi du Garridok, legebiltzarra eratzeko ekitaldian autogobernua berritzeari buruzko aipamena egiteagatik. EAJ, aldiz, pozik azaldu da bilkurak emandakoarekin eta Mahaiaren eraketarekin. Joseba Diez Antxustegik Tejeriaren hitzaldia goraipatu du. Bereziki, akordioetan azpimarra egin izana nabarmendu du jeltzaleen legebiltzarreko eledun izendatu berriak. Ildo horretan, adierazi du EAJk talde guztiekin hitz egin duela legebiltzarreko Mahaiaren eraketaz, baita EH Bildurekin ere, nahiz eta koalizio subiranistak kontrakoa esan. Diez Antxustegik erantzun du alderdiko eta legebiltzarreko taldeko ordezkariekin hitz egin dutela. Jon Hernandez Sumarreko ordezkari bakarrak abstentziora jo du bozketa guztietan; ez du hautagai bakar baten alde egin. Inork ez baitio aldeko botoa eskatu, eta EAJk eta PSE-EEk gehiengoa baliatu dute Mahaia nahierara eratzeko, Hernandezek argitu duenez. Hala ere, Sumarrentzat, garrantzitsuena legealdia abiatu izana da, proposamenak egiten hasteko beta emango baitie. Ildo horretan, Hernandezek nabarmendu du Sumarrek «politika aurrerakoiak» sustatuko dituela. PSE-EEk ez du baloraziorik egin nahi izan. Eneko Andueza izan zen azkeneko legealdian sozialisten bozeramailea legebiltzarrean, baina ez du prentsaren aurrean hitz egin. Hala ere, alderdiak haren izena erregistratu du legebiltzarreko taldeko bozeramaile gisara. Ikusteko dago osatzear den Eusko Jaurlaritzan sartuko den edo ez, eta, hala eginez gero, bozeramaile nor izendatuko duten. Gaur-gaurkoz, Maria Jesus San Jose da eledunaren albokoa legebiltzarrean. Autogobernua Bakartxo Tejeriak, bere lehen hitzaldian, «aurkari politikoarekiko errespetua» eskatu die legebiltzarkideei, eta Joseba Leizaolak 1980an Eusko Legebiltzarreko lehendakari izendatu zutenean helarazitako hitzak ekarri ditu gogora, «Euskadi gure nazioa» eraikitzen jarraitu behar dela azpimarratzeko. Azken hiru legealdietan ganberako presidente izan denak eta laugarren aldiz erakunde hori gidatuko duen parlamentariak «akordio zabalak» eskatu ditu egungo erronka handiek «erantzunak» izan ditzaten: «Zenbat eta zabalagoak, orduan eta hobeto». Trantsizio ekologikoa, digitala eta «zerbitzu publikoak indartu» beharra aipatu ditu erronka batzuk zerrendatzean. Horrez gain, argi utzi du legealdi honetan legebiltzarrak «estatus berriari dagokion eztabaida» egingo duela. Esplikatu du «ezinbestekoa» dela «akordio bat» erdiestea Gasteizen, Espainiako Gobernuarekin negoziatzeko ondoren. Gernikako Estatutua «berritu» behar dela nabarmendu du, eta erantsi Espainiako Estatuaren «plurinazionalitatea» gauzatu behar dela. Legebiltzarra eratuta, ostegunerako deitu du hurrengo bilkurara. Bateraezintasunen Batzordea hautatuko dute orduan, eta haren ostean jakinaraziko du noiz izango den Eusko Jaurlaritzako lehendakari izendatzeko inbestidura ekitaldia. Argitzeko dago, dena den, zenbat lehendakarigai izango diren. EH Bilduk ez baitu erabaki Imanol Pradales EAJren hautagaiarekin lehiatzeko Pello Otxandianoren hautagaitza aurkeztuko duen ala ez. EH Bilduko Pello Otxandiano eta EAJko Imanol Pradales, elkar agurtzen. ENDIKA. PORTILLO / FOKU Agurreko giroa Aurreko legealdiko Mahaiko kideek gidatu dute saioaren hasiera, eta, ondorioz, azkenekoz hartu dute parte bilkuran Iñigo Iturrate jeltzaleak, Txarli Prieto sozialistak eta Gustavo Angulo Elkarrekin Podemoseko ordezkariak, ez baitute legebiltzarrean jarraituko. Gonbidatuen tribunatik entzun dute saioa, Adineko Mahaia eratu denean. Izan ere, parlamentari zaharrenek eta gazteenek gidatu dute bozketa: Miren Gallastegik, Susana Corcuerak, Irune Zuluagak, Eraitz Saez de Egilazek eta Edurne Benito del Vallek. Iñigo Urkullu buru, azkenekoz izan dira Eusko Legebiltzarrean Eusko Jaurlaritzako jarduneko sailburuak ere. Gobernuari dagokion lehen ilarako eserlekuetatik ikusi dute agurreko giro nabarmena izan duen bilkura. Saioan keinu ugari izan baitira. Iñigo Urkullu lehendakariarena eta ziurrenik haren lekua hartuko duen Imanol Pradalesena izan da horietako bat: luzaz aritu dira biak hizketan. Ikusmin handia izan du saioak, eta hedabideentzako gordetako eserlekuak ez ezik, gonbidatuentzako aulkiak ere bete dira. Besteak beste, han izan dira foru aldundietako, Batzar Nagusietako eta alderdi politikoetako ordezkariak. Zein funtzio nagusi ditu mahaiak? Legebiltzarreko lanak antolatzeko beharrezko diren erabakiak eta neurriak hartzea. Legebiltzarraren aurrekontu proiektua prestatzea. Legebiltzarraren gastuak agintzea. Legebiltzarreko dokumentuak kalifikatzea, bai eta testu horien onargarritasuna edo onartezintasuna erabakitzea ere. Legebiltzarraren jardunaren ildo nagusiak programatzea, Osoko Bilkuraren eta batzordeen jarduera egutegia zehaztea bilkura aldi bakoitzerako eta legebiltzar organoen lanak koordinatzea. Bozeramaileen Batzordearekin adostuta, legebiltzarreko batzordeak osatuko dituzten kideen kopurua ezartzea. Erabakiak hartzea edo osoko bilkurari proposatzea, Bozeramaileen Batzordeak aho batez onartu ondoren, presazko arrazoiak edo eduki instituzionala dela-eta ohiko moduan tramitatzekoak ez diren idatzien gainean.

KPIa % 3,5eraino igo da apirilean EAEn, eta % 2,9raino jaitsi, Nafarroan.

Realak garaipen historikoa lortu zuen iaz Nou Campen. Bartzelonaren zelaian irabazita, aspaldiko bolada txarra eten, eta urrats ia erabakigarria egin zuen hamar urteren ostean Txapeldunen Ligarako sailkatzeko. Gaur, ordea, Europarako sailkatzeko bidean urratsa egin ezinik geratu da Bartzelonan. 2-0 galdu du Montjuicen Xavi Hernandezek entrenatutako taldearen aurka, Espainiako Lehen Mailako 35. jardunaldiko azkeneko partidan. Horren ondorioz, zazpi jardunaldiz jarraian sailkapeneko seigarren postuan egon eta gero, koska bat egin du behera, zazpigarrenera. Betisek hartu dio aurre. 55 puntu ditu Espainiako taldeak, eta bat gutxiago Imanol Alguacilek entrenatutakoak: 54 puntu. Hau da, liga gaur amaituko balitz, Betisek Europa liga jokatuko luke datorren denboraldian, eta, Realak, Konferentzia liga. Baina, hiru jardunaldi falta dira jokatzeko, eta itxura du azkeneko partidaraino ariko direla Betis eta Reala Europa ligan aritzeko azkeneko tokia bereganatzeko lehian. Buruz buruko estu horretan erabakigarria izan daiteke igande honetan Sevillan (Espainia) bi taldeek jokatuko duten neurketa. Anoetan, hutsean berdindu zuten. Baliteke Betis zein Reala Europarako sailkatuta egotea igandera iritsi aurretik. Txuri-urdinek nahikoa dute ostegunean Anoetan Valentziari irabaztea. Hori eginda, bosgarrenez jarraian sailkatuko lirateke Europarako. Gutxienez, Konferentzia ligan ariko lirateke. Berdintzeak ere balioko lieke, baldin eta bihar Vila-realek Gironan (Herrialde Katalanak) irabazten ez badu. Betisek Realaren egun berean jokatuko du, Las Palmasen (Espainia). 19:30ean hasiko da partida hori, eta 22:00etan Realarena. Beraz, aurkari nagusiak egin duena jakinda ariko dira txuri-urdinak. Goitik behera Bi egun pasatxo dituzte hurrengo partida bete-betean prestatzeko. Berehala ahaztu behar dute gaurko neurketa. Oraingoan, ez dute ezustean hartu Bartzelona. Iaz, liga irabazia zuen Kataluniako taldeak Realaren aurka jokatu zuenerako, eta ez zen bete-betean aritu. Baina, egungo egoerak ez du inolako antzik ordukoarekin. Denboraldi eskasa egin eta gero, ligan bigarren geratzea da Bartzelonaren lehentasuna. Horregatik aritu da gaur bete-betean. Gironak berdindu izana baliatu nahi zuen bigarren postura jauzi egiteko. Nahi, eta lortu. Imanolek 5-4-1 sistemaren alde egin du: Traore, Pacheco, Le Normand, Aritz Elustondo eta Aramburu zelairatu ditu defentsan; Brais Mendez, Merino, Turrientes eta Oiartzabal zelai erdian; eta Becker aurrean. Apustua ondo irten zaio lehen 25 minutuetan, nagusi izan baita. Gutxigatik ez du saria jaso. Beckerrek sortu du arrisku gehien: bosgarren minutuan, gutxigatik bota du baloia langa gainetik; hemeretzigarrenean, bakarrik geratu da Ter Stegenen aurrean, baina epaileak jokaldia baliogabetu du, Realeko aurrelariak Cubarsiri falta egin diolakoan; eta 22.ean, gola sartu du, baina epaileak baliogabetu egin dio, jokoz kanpo zegoelakoan. Ondo ari ziren txuri-urdinak. Bartzelona, aldiz, deseroso zegoen. Baina, pixkanaka, etxeko taldeak gora egin du, eta arriskua sortzen hasi da. Lamine Yamalek eman du lehen abisua, eta 26. minutuan gutxigatik bota du baloia kanpora. Aukera argiagoa izan du Rapinhak 38. minutuan, haren jaurtiketa zutoinera joan baita. Gundoganek gutxigatik ez du gola sartu aldaratzean. Hurrengo jokaldian, ordea, Lamine Yamalek ez du barkatu, eta bikain biribildu du Lewandowskik eta Gundoganek bideratutako kontraerasoa. 1-0. 40. minutua zen. Horrela amaitu da lehen zatia. Bi zati ezberdin izan ditu: aurrenekoan, Reala gailendu da, eta, bigarrengoan, Bartzelona. Baina etxekoek bakarrik asmatu dute gola sartzen. Bigarren zatiaren hasiera aurreko minutuen joera beretik joan da. Rapinhak bitan jarri du estutasun handitan Remiro urrutitik: 48. minutuan, gutxigatik joan zaio baloia langa gainetik; 65.ean, berriz, Realeko atezainak geldiketa bikaina egin dio. Baina etxekoak gehien estutzen ari zirenean, txuri-urdinek aukera oso argia izan dute. 67. minutuan, Gundoganek pase txarra eman du bere area inguruan, Brais Mendezek jaso du baloia, arean sartu da, eta haren jaurtiketa oso gutxigatik joan da kanpora. Partidako aukera garbiena izan da. Hor izan du Realak banakoa. Imanolek aldaketak egin ditu 70. minutuan; hiru kolpe batez: Tierney, Barrenetxea eta Kubo zelairatu ditu Pachecoren, Arambururen eta Beckerren ordez. 5-4-1 sistema 4-3-3koagatik aldatu du. Erasokor jokatu nahi zuen. Eta lortu du. Kubok jaurtiketa arriskutsua egin du irten berritan, baina Ter Stegenek ondo gelditu du baloia. Geldiketa oraindik eta hobeagoa egin dio Remirok 77. minutuan Ferran Torresi. 2-0koa zen. Imanolek azkeneko bi aldaketak egin ditu 79. minutuan: Odriozola zelairatu du Traoreren ordez, eta Zakharian, Brais Mendezen ordez. Aldaketek ez dute ezer aldatu. Are gehiago, Odriozola zoritxarreko protagonista izan da. 89. minutuan, Rapinhak botakako faltak atzelariaren eskuan jo du. Epaileak ez du penaltia adierazi, baina erabakia aldatu du jokaldia telebistan ikusi eta gero. Rapinhak berak bota du penaltia 94. minutuan, eta bigarren gola sartu du. Hortxe amaitu da partida.