Eusko Jaurlaritzako Segurtasun Sailak jakinarazi duenez, Ertzaintza atzo Irunen hil den pertsona baten heriotza ikertzen ari da. Azaldu duenez, bihotzekoak jota hil da ospitalean, baina hil baino lehen ertzain batzuei aurre egin zien, atzo. Ertzaintzaren jokabideaz arduratzen den unitateak hartu du barne ikerketa. Segurtasun Sailaren arabera, gertaerak errepide istripu bat izan zuen abiapuntu, Irunen (Gipuzkoa), GI-636 errepidean, 20:00ak inguruan. Auto baten eta moto baten arteko istripua izan zen. Moto gidaria zauritu egin zen, eta Bidasoaldeko ospitalera eraman zuten. Autoko gidaria, ordea, ihes egiten saiatu zen. Segurtasun Sailak zehaztu du azken hori oso urduri zegoela, beste pertsona batzuk mehatxatu zituela eta hara joan ziren ertzainei eraso egin ziela. Une horretan bihotzeko bat izan zuela adierazi du Eusko Jaurlaritzak, eta tokian bertan zeuden larrialdietako langileek artatu zuten. Egonkortzea lortu bazuten ere, gero ospitalera eraman zuten eta han hil da. Eusko Jaurlaritzaren arabera, Ertzaintza «berehala» hasi da gertatutakoa ikertzen. Barne ikerketa abiatzeaz gain, Kontrol eta Gardentasun Batzordeari gertatutakoaren berri ere eman diola jakinarazi du Segurtasun Sailak.

Osasunak 4-0 galdu du Gironaren zelaian. Montilivi estadioan jokatutako partidan, Vicente Morenorenek ez diote arazorik sortu etxeko taldeari. Girona nagusi izan da jokoan, eta nagusitasun hori markagailuan islatu da. Ligako lehen partida berdindu eta bigarrena irabazi ostean, denboraldiko lehen porrota izan dute gorritxoek. Partida hasi den orduan ezagutu ditu Gironak Txapeldunen Ligan aurrean izango dituen aurkariak. Ez zaizkie lan errazak egokitu; aurre egin beharko dieten taldeen artean daude Liverpool, PSG, Milan eta Arsenal. Txapeldunen Ligako zozketak emozio handiagoa izan du partidaren lehen ordu laurdenak baino. Etxeko taldea zen nagusi, baina ez zuen lortzen Serio Herreraren atera iristea. Lehen zatiaren erdian, 22. minutuan, eduki du etxeko taldeak lehen aukera garbia. Bryan Gil Osasunaren area barruraino sartu da, eta jaurtiketa ona egin du; baloia sareetara zihoan, baina eskua atera du Herrerak, eta Gironaren lehen gola ekidin. Bost minutu geroago, Bryan Gil berriz ere Herreraren ate aurreraino iritsi da, baina Juan Cruz Osasunako atzelariarekin tupust egin du, eta erori egin da. Penaltia eskatu dute, baina epaileak ez du halakorik adierazi. Hirugarrenean, ordea, Gironak ez du barkatu. 34. minutuan, Tsigankovek erdiraketa ederra egin du eskuin hegaletik; Bryan Gil atzetik iritsi da, hanka luzatu du, eta ezker zutoinaren albotik sartu du baloia. Horrela iritsi dira atsedenaldira, markagailua etxeko taldearen alde: 1-0. Osasunak ez du gol aukera bakarra ere sortu lehen 45 minutuetan. Lehen zatia amaitu bezala hasi da bigarrena ere: Girona baloiarekin, behin eta berriz Osasunaren areara iristen. Denbora kontua zen etxekoen bigarren gola iristea, eta 53. minutuan heldu da. Gironak gorritxoen oinetan zegoen baloia berreskuratu du, Torrok ez du lortu baloia urruntzea, eta area barruan zegoen Tsigankoven oinetara iritsi da. Hark sartu du etxeko taldearen bigarrena. Segituan heldu da hirugarrena ere. Bigarrena sartu eta hiru minutura, Yangel Herrerak bularrarekin egin dio pasea Abel Ruizi. Eta hark oinaren kanpoaldearekin jo du baloia area ertzetik; Herrerak ezin izan du ezer ere egin gola ekiditeko. Michelen taldeak, ordea, ez dio erasoari etenik jarri. Behin eta berriz Herreraren atea arriskuan jartzen jarraitu dute. Partida amaitzear zela, laugarrena ere sartu du Gironak. Osasunak partidan zehar egin duen eraso jokaldi garbienetako baten ostean iritsi da. Van de Beekek pase bikaina egin dio, eta Stuanik nahikoa izan du baloia bultzatzearekin. Horrela amaitu da neurketa. Osasunak ia ez du lortu baloia beren zelaigunetik ateratzea. Gironaren atera gerturatu diren gutxietan, segituan galdu dute baloia. Partida osoan zehar ez dute atera jaurtiketa bakar bat ere egin gorritxoek. Baloiaren jabetzari erreparatzea nahikoa da etxeko taldearen nagusitasunaz jabetzeko; norgehiagokaren %60an baloia Gironako jokalarien oinetan egon da. Vicente Morenoren taldearentzat lehen porrota izan bada, lehen garaipena izan da aurreko denboraldian hirugarren amaitu zuen Gironarentzat. Orain, bi taldeak berdinduta daude sailkapenean, launa punturekin. Osasunak igandean jokatuko du ligako laugarren partida. 17:00etan izango da, Sadarren, Celtaren aurka. Gorritxoak gaurko porrota albo batera utzi eta Mallorcaren aurka erakutsi zuten jokora itzultzen saiatuko dira. Boyomoren fitxaketa Partida horretarako atzelari berri bat izango du Vicente Morenok. Gaur bertan, partida hasi baino ordu batzuk lehenago, iragarri du Osasunak Enzo Boyomoren fitxaketa. Orain arte Valladoliden aritu da erdiko atzelaria, eta bost urterako akordioa sinatu du Nafarroako taldearekin. Bost milioi euro ordaindu dituzte harengatik. Boyomo Tolosakoa da (Okzitania), eta 22 urte ditu. Azken denboraldia Valladoliden egin zuen, eta, Osasunak zabaldutako prentsa oharrak dioenez, bigarren mailako erdiko atzelari «onenetakoa» izan zen. Aurten aritu da lehen aldiz Espainiako ligako lehen mailan. Valladolidek orain arte jokatutako hiru partidetan izan da titular. Datozen egunetan aurkeztuko du Osasunak.

Josep Borrell EB Europako Batasuneko diplomaziaburuak Israel zigortzeko atea ireki du, EBko Kontseiluak gaur Bruselan egin duen bileraren aurretik. EBko kide diren 27 herrialdeetako Atzerri ministroak bildu ditu, eta horiei eskatu die Israel zigortzeko «taburik» ez izatea. Haren hitzetan, Israelgo zenbait ministrok palestinarren aurka zabaldu dituzten gorroto mezuak «onartezinak» dira. Borrellek bileraren ondoren jakinarazi duenez, bere asmoa da Israelgo Finantza ministro Bezalel Smotrich eta Defentsa ministro Itamar Ben Gvir zigortzeko tramiteak hastea, nahiz eta aitortu duen EBko kide gehienak ez datozela bat harekin. EBko diplomaziaburuaren ustez, Israelgo ministro horiek «nazioarteko zuzenbidearekin» bat ez datozen proposamenak egin dituzte. Gainera, gehitu du «gerra krimenak» egiteko instituzioa direla. Palestinarren aurkako mezuak zabaldu dituztenen artean, Israel Katz Atzerri Ministroa aipatu du Borrellek, atzo eginiko adierazpenetan Zisjordanian bizi diren palestinarrak ebakuatzeko aukera aipatu baitzuen ministro horrek, azken egunetan Israelek eremu horren aurkako erasoak areagotu ostean. Zisjordaniako palestinarrekin Gazakoekin egiten ari diren gauza bera egin nahi izatea leporatu dio Israelgo Atzerri ministroari Borrellek, eta dei egin die EBko Kontseiluaren bileran parte hartu duten Atzerri ministroei Zisjordaniako egoeraren aurka ahotsa goratzeko. Israelgo Gobernuak Palestinan diharduten NBE Nazio Batuen Erakundearen agentziei «izugarrizko presioa» ezartzen diela ere salatu du, eta haien lana oztopatzen duela. Hain zuzen, iazko urrian Israelek Gazaren aurkako oldarraldia areagotu zuenetik, 280 langile humanitario baino gehiago hil dituzte Israelgo armadak eginiko bonbardaketetan eta erasoetan. Gehienak UNRWA Nazio Batuen Erakundearen Palestinar Iheslarientzako Laguntza eta Lan Bulegoko kideak ziren: 207, agentzia horren buru Philippe Lazzarinik duela bi aste esan zuenez. Gazako egoeraz gain, EBko Kontseiluak egin duen bilerak Ukrainako gerra, Venezuelako krisi politikoa eta EBk Turkiarekin dituen harremanak izan ditu hizpide. Bilera horretan ere Gai Humanitarioak Koordinatzeko eta Gaza Berreraikitzeko Nazio Batuen Bulegoak eginiko txosten bat ere aurkeztu du erakunde horren arduradunak, Sigred Kaagek. Netanyahuren proposamena Etzi da hastekoa Gazan polioaren aurkako txertaketa kanpainak izango dituen erronden arteko lehena; ia milioi bat dosi jaso dituzte hango osasun agintariek. Bada, OME Munduko Osasun Erakundeak jakinarazi duenez, kanpainak iraungo dituen egunetan «etenaldi humanitarioak» egitea adostu dute Israelek eta Hamasek. OMEko goi kargudun Rik Peeperkornen arabera, etenaldiak 08:00ak eta 17:00ak artean egingo dituzte. Hain justu, Benjamin Netanyahu Israelgo lehen ministroak OMEk iragarpena egin baino zenbait ordu lehenago ohartarazi du prest egongo litzatekeela Gazan egiten ari diren «operazio militarrak» aldi baterako eteteko, zerrendan bizi diren haurrek polioaren aurkako txertoa jaso dezaten. Hori bai, uko egin dio txertaketa kanpainak iraun bitartean «su eten orokor bat» ezartzeari, eta azaldu du borroken etenaldiek unean uneko txertaketa eremuei soilik eragingo dietela. Hamasek proposamena onetsi du. UNRWAk adierazi duenez, ordea, erronka ugari izango ditu txertaketa kanpainak: polioaren aurkako txertoa jaso behar duten haur guztiak kokatzea eta horiengana heltzea, besteak beste. Hamar urtez azpiko 640.000 haur daude Gazan, ia denak bizilekutik urrun —NBEren arabera, Gazako hamar palestinarretik bederatzi lekualdatu dira Israelen erasoaldiaren ondorioz—. Beraz, UNRWAk salatu du txertaketa kanpaina koordinatzea «ia ezinezkoa» izango dela. Jihad Islamikoaren buruzagietako bat hil du Israelek Israelgo armadak esan du Jihad Islamikoa talde armatuaren buruzagietako bat hil duela Zisjordaniako Tulkarem hirian, gaur goizaldean. Ohar batean jakinarazi dutenez, hiri horretan jarduten zuen brigadaren burua zen Mohamad Jaber, eta meskita batean babesten ari zela hil dute beste lau miliziano palestinarrekin batera. Palestinako Osasun Ministerioak emandako datuen arabera, urte hasieratik hona 315 palestinar baino gehiago hil dira Israelgo armadak egindako erasoetan. Iragan urriaren 7az geroztik, berriz, 655 pertsona inguru hil dituzte; horietatik 147 haurrak ziren. Azken astean nabarmen areagotu da Zisjordanian bizi diren palestinarren aurkako indarkeria: abuztuan ia 70 palestinar hil dira Israelgo armadaren erasoetan, eta gutxienez bat kolono israeldarrek eginikoetan. Atzo goizaldean, esaterako, Israelek Jenin, Tulkarem eta Tubas hiriei egin zien eraso, eta hamar palestinar hil zituzten, PAN Palestinako Aginte Nazionaleko Osasun Ministerioaren arabera. Hala, Zisjordaniako palestinar zibilak babesteko neurriak har ditzala eskatu diote AEB Amerikako Estatu Batuek Israeli, Etxe Zuriak argitaratutako ohar batean. Horrez gain, oharrean AEBek azaldu dute Israelek «ekintza terroristen» kontra babesteko eskubidea duela.

2024an izan duen mailarik baxuenean dago, hiru hilabetez beheranzko bidean egon ondoren.

Alaves nagusitu da denboraldiko lehen derbian. Luis Garcia Plazak entrenatutako taldeak 1-2 irabazi dio gaur gauean Realari Anoetan, Espainiako Lehen Mailako hirugarren jardunaldian. Horri esker, Arabako taldeak sasoiko lehen garaipena lortu du. Lau puntu ditu bederatzitik, aurreko jardunaldian berdindu egin baitzuen Betisekin Mendizorrotzan. Uzta oso ona da. Realak, ordea, ezin izan dio segida eman azken jardunaldian Espanyolen zelaian lortutako garaipenari. Berriro galdu du etxean, aurreneko jardunaldian ere esku hutsik geratu baitzen Anoetan, Rayoren aurka galduta. Hiru puntu ditu bederatzitik. Uzta eskasa da. Partida bizi-bizi hasi da, eta lehen hamar minutuetan talde bakoitzak bi aukera izan ditu gola sartzeko. Realak izan ditu lehen biak, baina ez Kubok, ez Oiartzabalek ez dute asmatu. Aukera argiagoak izan ditu Alavesek, biak korner jaurtiketetan, baina Remirok geldiketa ederrak egin dizkie Picak eta Villalibrek egindako burukadei. Norgehiagokaren erritmoak behera egin du gero. Reala aritu da deserosoen minutu horietan, partidaren aginte-makila hartu ezinik. Alavesek, berriz, ez zuen arriskatzeko inolako beharrik. Etxean jokatuta, Imanol Alguacilek entrenatutako taldeak zuen presio eta premia gehien. Halako batean, zelai erdiko jokaldi bakartu batean, Oiartzabal eta Benavidez lurrera erori dira euren oinek tupust egin eta gero. Sanchez Martinez epaileak Realaren aldeko falta adierazi du, eta txartel horia atera dio Alaveseko erdilariari. Baina, handik gutxira, jokaldia telebistan ikustera joan da, eta irudietan zera ikusi du: nahi gabe, baina Oiartzabalek orkatila zapaldu dio Benavidezi. Hala, erabakia aldatu du: baliogabe utzi du uruguaitarrari ateratako txartel horia, eta txartel gorria atera dio eibartarrari. Oso zorrotz jokatu du epaileak. 28. minutua zen, eta Realak jokalari bat gutxiagorekin jokatu beharko zuen. Kolpe gogorra zen etxekoentzat. Baina, lau minutu eskasetan, etsipenetik zoramenera pasatu dira, Oiartzabalek zelaia haserre bizian utzi eta ia hurrengo jokaldian gola sartu baitu Brais Mendezek. Bikain errematatu du area barruan Sergio Gomezek ezkerretik egindako erdiraketa neurtua. Partida nola okertu zitzaion kontuan hartuta, sekulako bultzada zen Realarentzat. Aldiz, Alavesentzat kolpe gogorra zen, lehia aldeko jarri baitzitzaion jokalari bat gehiagorekin arituta. Baina, Realari gertatu bezala, Alaves beltzetik zurira pasatu da minutu gutxian. Lehen zatiaren hondarrean, 49. minutuan, korner batean, Zubeldiak heldu egin dio Abqarri, eta epaileak penaltia adierazi du. Villalibrek bota du, eta ez du huts egin, eta neurketa berdindu du. Halaxe amaitu da lehen zatia: etsita joan dira etxekoak aldageletara; aldiz, konforme bisitariak. Toni Martinezen gol erabakigarria Imanolek eta Garcia Plazak aldaketak egin dituzte atsedenaldian. Realeko entrenatzaileak sendotasunaren alde egin du, eta Jon Martin zelairatu du Pachecoren ordez —min hartuta egon da azken egunetan, eta epaileak txartel horia atera dio lehen zatian—. Aldiz, Alaveseko teknikariak erasokor jokatu du, Stoichkov atera baitu Benavidezen ordez. Hain zuzen, zelairatutako bi jokalariek izan dituzte lehen aukerak bigarren zatiaren hasieran. Ezer gutxi gertatu da hurrengo 25 minutuetan, partida askotan eten baita, faltak direla eta. Zerbait aldatzeko asmoz, bi entrenatzaileek aldaketa gehiago egin dituzte: Garcia Plazak Manu Sanchez, Kike Garcia eta Toni Martinez zelairatu ditu Diarraren, Villalibreren eta Rebbachen ordez; Imanolek, berriz, Sadiq atera du Beckerren ordez. 74. minutuan, Toni Martinez bakarrik geratu da Remiroren aurrean, baina haren jaurtiketak zutoina jo du, atezainak ukitu eta gero. Hiru minutu geroago, ordea, arantza atera du: aldaratze bat jaso du area barruan, eta gola sartu du, 1-2koa. Aurrelari espainiarra lehen aldiz aritu da Alavesekin, eta estreinako ederra izan du. Are ederragoa izan zitekeen, gola sartu eta bi minutura berriro gola egitear egon baita buruz. Nagusi ziren bisitariak, eta sufritzen ari ziren etxekoak. Hori ikusita, 81. minutuan, Imanolek hiru aldaketa egin ditu kolpe batez: Turrientes, Olasagasti eta Pablo Marin zelairatu ditu Brais Mendezen, Sergio Gomezen eta Zubeldiaren ordez. Erdizka lortu du helburua: sufritzeari utzi dio pixka bat Realak, baina ez da gai izan arriskua sortzeko. Azkenean, hiru puntuak bisitarientzat, eta alerik ez etxekoentzat. Partidak talde baten eta bestearen inguruko usteak indartu ditu: itxura ona du Alavesek; Reala, ordea, ahulagoa da Le Normand eta Merino gabe geratu eta gero. Indartu beharrean da. Klubak badu lana hurrengo bi egunetan, fitxaketak egiteko epea amaitu aurretik.

Getaferen aurka etxean berdindu eta Bartzelonaren zelaian galdu ostean, denboraldiko lehen garaipena lortu du Athleticek. 1-0 garaitu du Valentzia, San Mamesen. Ernesto Valverderen 400. partida izan da Bizkaiko taldearen entrenatzaile gisa; opari gisa hiru puntu lortu dituzte. Nico Williams deialdian sartu bazuen ere, Valverdek aulkian utzi du partida hasieran. Alvaro Djalok jokatu du lehen aldiz talde zuri-gorriarekin, eta, bigarren zatian, Nico Williams sartu da haren ordez. Zelaiaren beste aldean, atean, Julen Agirrezabalak jokatu du gaur. Aurreko partidetan Padilla aritu zen. Bestalde, Valentziaren atea ondo zaindu du Giorgi Mamardaxvilik. Georgiarrak Liverpoolekin sinatu berri du, baina denboraldi amaierara arte Valentzian jarraituko du, utzita. Lehen zatiko gol aukera guztiak Athleticek sortu ditu. Valentzia gerturatu da uneren batean Agirrezabalaren atera, baina ez dute atera baloirik jaurti. Hamabigarren minutuan iritsi dira zuri-gorriak lehen aldiz Mamardaxviliren atera. Erdiraketa bat ukabilekin kanporatu du atezainak; baloia, ordea, Iñaki Williamsen oinetara iritsi da. Hark areaz kanpotik jaurti, eta goiko langa jo du; Sanceti iritsi zaio aldaratzea, baina ezin izan dio errematea jarri. Hogeigarren minutuan beste aukera bat izan dute Valverderenek. Gurutzetak jaurti du, baina Valentziako atzelari bati jo ostean, baloia Iñaki Williamsek errematatu du buruz. Pozoituta iritsi da baloia, baina Mamardaxvilik eskua atera du, eta baloia ez da sareetara sartu. Hurrengo minutuetan Valentzia izan da erasoan aritu dena, baina ez da asko gerturatu Agirrezabalaren atera. 32.ean, berriz ere Iñaki Williamsek arrisku egoera bat sortu du. Area barruraino sartu da, eta atzean zegoen Gurutzetari egin dio pasea; horrek, ordea, atearen erdi-erdira jaurti du. Arazorik gabe geratu du atezainak. Atsedenaldira iristear zirela, De Marcosek ezinezkoa zirudien erdiraketa bat egin du. Penalti puntutik errematatu du Beñat Pradosek, eta, zutoina ukitu ostean, Valentziaren atea zeharkatu du baloiak. Pradosek Athleticekin sartutako lehen gola izan da. Horrela iritsi dira atsedenaldira: Athletic jokoan nagusi, eta markagailuan ere bai, 1-0. Bigarren zatiaren hasiera parekatuagoa izan bada ere, segituan itzuli da agintera etxeko taldea. Halere, Valentzia zenbaitetan iritsi da Agirrezabalaren atera. Rioja izan da jokaldirik arriskutsuenak sortu dituen jokalaria, baina ez dute lortu Agirrezabala estuasunetan jartzerik. Valverderen taldea izan da bigarren zatian ere gol aukera gehien sortu dituena. 83. minutuan area barruraino iritsi da Nico Williams, jaurtiketa ona egin du, baina are eta hobe geratu du Mamardaxvilik. Hurrengo jokaldietan ere partida errematatzeko aukera eduki du etxeko taldeak, baina ez dute lortu bigarren gola egiterik. Azkenera arte berdintzeko aukera eduki dute Valentziakoek. 90. minutuan bertan, Dani Gomez berdinketaren gola sartzeko zorian egon da, baina jokoz kanpo zegoen. Gero, Athleticeko zaleen tentsioa areagotzeko, epaileak hiru minutu gehitu ditu. Eta, geroago, beste minutu bat. Halere, Valentziak ez du lortu zuri-gorrien nagusitasunari aurre egiterik, eta 1-0 amaitu da partida. Partidako jokalaririk onena Mamardaxvili Valentziako atezaina izendatu dute. Larunbatean jokatuko dute hurrengo partida. Gaur bezala, San Mamesen izango da, arratsaldeko zazpietan eta Atletico Madrilen aurka. Nuñez, utzita Bizkaiko taldeak gaur bertan iragarri du Unai Nuñezen itzulera. Portugaleteko erdiko atzelariak azken bi denboraldiak Celtan egin ditu. Aurretik, bost urtez aritu zen Athleticen. Utzita arituko da ekainaren 30era arte, orduan, Athleticek jokalaria erosteko aukera edukiko du. 27 urteko jokalariak, besteak beste, Espainiako Superkopa irabazi zuen Athleticekin, 2021ean. Orain, berriz ere elastiko zuri-gorria jantziko du taldearen defentsa indartzeko asmoz. Bihar bertan egingo du lehen lan saioa Lezaman. Beste fitxaketa baten berri ere eman dute. Maite Valero Athleticeko jokalaria izango da. Orain arte Osasunan aritu den 20 urteko erdi-punta nafarra David Aznarren aginduetara arituko da.

Nafarroako Yalak Espainiako Estatuari eskatu dio «Israelekin dituen harremanak bertan behera uzteko», argudiatuta Israelek «giza eskubideak sistematikoki urratzen» dituela. Lurraldeko 30 udalek onartu dute mozioa, edo onartzeko bidean daude, eta, taldeak azaldu duenez, «Nafarroan eta Euskal Herrian aitzindaria da ekinaldia». «Harreman haustura horri eutsi beharko zaio Israelek giza eskubideen arloko legediak betetzen ez dituen bitartean, eta genozidioak, apartheidak eta okupazioak dirauten bitartean», borobildu dute. Gaur eman dute horren berri, Iruñean egindako prentsaurreko batean. Azaldu dutenez, zenbait udaletan jada aurkeztuak dituzte mozioak, baina, horietan, Palestinari elkartasuna adierazi bertzerik ez zen egiten. Oraingo ekinaldia «harago» doa, ordea, eskaera zuzenak egiten baitizkiote Espainiako Gobernuari. Izan ere, harremanak hausteko ez ezik, bertze hainbat eskaera egin dituzte mozioaren bidez: Israelek modua eman dezala Gazan janaria eta sendagaiak sartzeko; Israelendako diren armak eta petrolioa kentzea; Israelgo armadak suntsitutako etxeak berriz eraikitzea; Nazioarteko Zigor Auzitegiari laguntza handiagoa eskaintzea Israelen kontrako auzian; Palestina estatu bat dela aitortzea; Palestinako lurralde okupatuetatik datozen produktuetan jatorria ongi zehaztea; Europako Batasunaren eta Israelen arteko akordioa bertan behera uztea; eta Israelekin harreman gehiagorik ez izatea. Taldeak azaldu du aurkeztutako mozioa «arlo horretan adituak direnek» egin dutela, eta «legezko berme guztiak» dituela egokitasunari eta legezkotasunari dagokienez. Gehitu dute palestinarrak bizitzen ari direna «jasanezina» dela, eta mozioaren bidez Nafarroaren gaitasuna erakutsi daitekeela: «Aukera dugu erakusteko Nafarroa ez dela makurtzen interes ilun kolonialisten aurrean, eta gure herriak eta erakundeak solidarioak izan direla, direla eta izanen direla herri palestinarrarekin». Mozioa herriotan onartu dute: Erroibar, Otsagabia, Agoitz, Espartza, Atarrabia eta Auritz. Horrez gain, horretarako bidean daude bertze hainbatetan, hala nola Altsasun, Baztanen, Berriozarren, Uharten, Beran eta Irurtzunen.

Arabako langileek egungo fabrikazioarekin jarraitzeko bermeak eskatu dituzte, baita fabrikazioa Espainian gera dadila.

Jubilazio adina atzeratzeak lehenago hiltzeko arriskua handitzen du, Fedeak egindako ikerketa baten arabera. Ekonomia Aplikatuko Ikerketen Fundazioak gomendatzen du “kontuan hartzea zenbait lanbidek dakarten eskakizun fisiko, emozional eta mental maila”

Talgoren akzioek goranzko bideari ekin diote pixkanaka asteazken goizean, eta 3,965 euroan kotizatu dira.