Beste baso sute bat piztu da Euskal Herrian. Atzo iluntzean piztu zen sua 20:00ak aldera Arriola eta Narbaiza artean (Araba), Elgeako mendilerroan, Gasteiztik 25 kilometro ingurura. Hego haizeak lagunduta, sua zabaldu egin da gauean zehar, eta suhiltzaileek 13:00ak alderako lortu dute hura mugatzea, eta arratsaldean «ia erabat» kontrolatzea. Datozen orduetan haizea baretzeko zain daude, eta gaur gauean ere lanean segituko dute. Arabako Foru Aldundiak azaldu duenez, suhiltzaileak lanean aritu dira gau osoan zehar, baina azken egunetan euririk egin ez duenez eta mendia «zikin» dagoenez, azkar hedatu dira sugarrak. Erre direnak, batez ere, sastrakak eta iratzeak direla kontatu dute. 🔥 Atzo 20:00ak aldera Elgeako mendilerroan piztutako baso-sutea gau osoan egon da piztuta. 11:00etan, suak piztuta jarraitzen du, baina itzaltzeko lanak aurrera doaz. pic.twitter.com/9ZoP31QiGb — SOS Deiak – 112 (@112_SOSDeiak) October 19, 2025 SOS deiakek, berriz, esan du sua ez dela hiriguneetara hurbildu, ez dela etxebizitzarik hustu behar izan eta ez dela inor zauritu. Goizeko lehen orduan bide berriak ireki dituzte sua azkarrago itzali ahal izateko —sarbide zaileko leku batean piztu da sutea—, eta helikoptero baten laguntza ere izan dute. Araba, Bizkai eta Gipuzkoako suhiltzaileak ari dira lanean.

Aurtengo Nafarroa Oinez «historikoa» izan da. Antolatzaileek horrelaxe definitu dute arratsaldean egindako balorazioak. Jaiaren balorazio «oso positiboa» egin dute, jende mordoa izan delako gaur Atarrabian (Nafarroa) eta egunean zehar ez delako gorabehera aipagarririk izan. «Atarrabian hain berezia izan den Nafarroa Oinez hau» egiteko ahalegin kolektiboa ere azpimarratu dute. [galleries:horizontal:112] Arduradunek, gaur bertaratutakoei eskerrak emateaz gain, ausardia eskatu diete politikariei, «egungo zonifikazioa gainditu eta Nafarroako herritar guztien hizkuntza eskubideak bermatuko dituen hizkuntza politika ausart, integral eta eraginkorra bultzatzeko». Datorren urtean Nafarroako ikastolen jaia nork antolatuko duen ere iragarri dute: Zizur Txikiko San Fermin Ikastolak eta Vianako Erentzun Ikastolak. Gaurko festari dagokionean, Paz de Ziganda ikastolakoek esan dute ezarritako helburuak bete dituztela, eta arrakastaz egin diotela aurre «antolakuntza erronka handi horri». [articles:2148390] Buruz, bihotzez, oinez lelopean, gustu eta adin guztietara egokitutako eskaintza atondu dute antolatzaileek, ez alferrik, hamabost lan batzorde eratu baitira ikastolan, eta jo eta su aritu dira urte osoan lanean harian-harian ekinaldiak eginez, eta batez ere, asteburuari begirako eskaintza oparoa eraikitzen. iFrameResize({ log: true },’#nafOinez’);

Ezkaba mendiaren magalean elkartuko dira euskaltzaleak Nafarroa Oinez-en harira antolatutako jaialdian, Atarrabian. Paz de Ziganda ikastolak antolatu du aurtengoa, Buruz, bihotzez, oinez lelopean. Gustu eta adin guztietara egokitutako eskaintza atondu dute antolatzaileek, ez alferrik, hamabost lan batzorde eratu baitira Paz de Ziganda ikastolan, eta jo eta su aritu dira urte osoan lanean harian-harian ekinaldiak eginez, eta batez ere, asteburuari begirako eskaintza oparoa eraikitzen. iFrameResize({ log: true },’#nafOinez’); Jone Areta Urrestaratzu Nafarroa Oinez-eko komunikazio lantaldeko kideak azaldu du komunikazio lantaldea sortu zela lehenengo, grafismo taldearekin batera, leloa eta logotipoa lantzeko. Modu horretan, urte osorako lan lerroa ardaztea zen helburua. Leloaren definizioa etorri zen lehenik: Buruz, «etorkizunarekin konprometitua dagoen proiektu ekintzaile bat delako», bihotzez, «euskara eta euskal kultura maite ditugulako, gure ardatzak direlako eta pertsonak erdigunean jartzen dituen proiektua delako», oinez «mugimendu arduratsu bat garelako eta halaxe izaten segitu nahi dugulako: plurala, eguneratua eta osasungarria», azaldu du Aretak. Kontzeptu horiekin grafismo batzordera jo zuten gero, eta irudia josi zuten. «Marra leun eta goxoak eginez transmititu nahi izan dute mezua irudiaren bidez ere». Elkartasun taldeekin zubiak eraikitzen Gero jarri zituzten martxan hamaika jarduera. Izan ere, Atarrabia inguruko elkartasun taldeekin zubiak eraikitzea izan da beste xede nagusietako bat, eta urtean zehar egin dituzten jarduerak zubi horiek eraiki edo sendotzeko izan dira: «Ikastola gara, herria gara, euskara gara, hezkuntza gara, sozialak gara eta jasangarriak gara. Kontzeptu horiei lotuak izan dira gure jarduerak». Ez dituzte ekintza handi eta ikusgarriak bilatu, tokian tokikoekin egindakoak eta guztientzat eskuragarri izan zitezkeen ekinaldiak baizik. 200 lagunetik gora ibili dira, eta haiek egindako lan eskergaren emaitza da urtea eta egitaraua. Elkarlan horren isla izan da kanta eta bideoklipa egiteko prozesua ere. Bi lantalde elkartu ziren horretarako: komunikaziokoa eta jardueretarakoa, eta lantalde horri Igor Martinez ikasle ohia eta musikaria gehitu zitzaion. Sortze prozesua haiek egin bazuten ere, askotariko ahotsez ondutako kanta bat aurkeztu dute. Eñaut Elorrietak, Pirritx, Porrotx eta Marimototsek, Anne Lukin abeslariak eta Paz de Zigandako ikasle ohiek hartu dute parte kantuan. Baina baita Paz de Ziganda ikastolako abesbatzek eta irakasleek ere. Motxila 21 taldeak ere parte hartu du: Oinez egunean ere tokia izango dute egitarauan. Aretak azpimarratu nahi izan du Baionako Bernat Etxepare Lizeoko ikasleak ere Oinez-en izango direla, hirugarren urtez jarraian. Larunbatean haur jolasak eta aurpegi margoketak egiteaz beraiek arduratuko dira, eta igandean erronkako kideekin ibiliko dira. ‘Bizi oinez bizin’ Musika, dantza, jolasak, bertsolariak, herri kirolak eta askotariko eskaintza egongo da Nafarroa Oinez-en, jatekoaz eta edatekoaz gain. Halaber, gune guztietan egongo dira puntu moreak. Bestetik, antolatzaileek garraio publikoa erabiltzeko eskatu dute, ahal den neurrian. Eta ingurumen eta ibilbide batzordeek elkarlanean propio landu dute bizikletaz iritsi ahal izateko gida: Bizi oinez bizin. Iruñerrian dauden bide gorriak identifikatu dituzte, eta Atarrabiara iristeko bide guztiak eskura jarri dituzte. Gainera, bizikletak aparkatzeko tokiak ere prestatu dituzte. Izan ere, Nafarroa Oinez «Nafarroako ekitaldi publiko jasangarria» dela baieztatu du Nafarroako Gobernuko Landa Garapeneko eta Ingurumeneko Departamentuak. Zigilu hori lortu du jasangarritasunaren mesedetan egindako lan eskergarengatik. Besteak beste, bizikletan iristeko erraztasunak emateaz gain, Villabesa garraio publikoaren zerbitzuak ugarituko dira, hondakinen eragina murrizteko birziklapena sustatuko da eta ikasleak ere hartarako sentsibilizatu dituzte.

Gaurkoan ere ez da posible izan. Osasuna punturik batu gabe jarraitzen du Sadarretik urrun: bost partida, eta bost porrot. Gorritxoek 10 puntu dituzte sailkapenean, baina denak etxean lortutakoak. Gaur 1-0 galdu du Atletico Madrilen zelaian. Ez du aparte izan berdinketa lehiatu ere ondo egin du, eta ziurrenik puntu bat merezi zuen. Baina ez ditu izan dituen momentu onak baliatu; bai, ordea, Atletico Madrilek. 70. minutuan Almadak gola sartu du, eta gorritxoak esku hutsik bueltatu dira etxera. Getaferen aurka zelairatutako hamaikakoarekin alderatuz, bi aldaketa egin ditu Alessio Liscik: Juan Cruz min hartuta dago, eta haren tokian Herrandok jokatu du; bestalde, Ruben Garciak hartu du Moi Gomezen tokia. Atletico Madril nagusi izan da neurketaren hasieran. Jokoaren ekimena izan du, eta bizi mugitu du baloia. Hala, zelai erditik aurrera dituen jokalariak asko mugitu dira, eta arazoak sortu dizkiete Osasunaren atzealdeko jokalariei. Gola ere sartu du Madrilgo taldeak. Baenak sartu du, Julian Alvarezen pase bikain bat jaso eta gero, 9. minutuan. Baina De Burgos Bengoetxea epaileari zera eskatu diote: VARean ikustera joateko. Telebistan ikus eta gero ez du ontzat eman, Griezmann jokoz kanpo zegoela argudiatuta. Lehen 20 minutuetan Atletico Madril oso nagusi izan da, eta gorritxoek sufritu egin dute. 16. minutuan Herrerak gelditu bikaina egin dio Griezmanni. Aurrelaria parez-pare geratu da haren aurrean, eta ondo atera dio eskua. 20. minututik aurrera norgehiagoka aldatzen joan da. Atletico Madrileko aurreko jokalariak ez dira hainbeste mugitu, eta horren ondorioz Osasunako atzelariek hobeto eutsi diete. Gainera, nafarrek gehiago izan dute baloia, eta Oblaken atera gerturatzen hasi dira. Victor Muñozek eragin die buruhauste gehien Atletico Madrilen atzelariei. 23. minutuan abagune ona izan du aurrelariak, baina errematea kanpora joan zaio gutxigatik. Argiagoa izan da Torrok izan duena. Ruben Garciak ondo jaurti du falta bat, eta bigarren zutoinean egin du errematea erdilariak. Oblakek, ordea, baloia aldentzea lortu du. Catena gertu zegoen aldaratzea jasotzeko, baina ez du lortu. Lehen zatiko azken 15 minutuetan lehia asko parekatu da. Bi taldeak buruz buru lehiatu dira, baina ez batek, ez besteak ez dute aukerarik sortu. Tarte horretan aldaketa bana egin behar izan dituzte bi taldeek. Osasunan Rosierrek min hartu du, eta haren ordez Iker Benito zelairatu da; Atletico Madrilen, berriz, Nico Gonzalezek zelaia utzi behar izan du, buruan jasotako kolpe baten ondorioz apur bat zorabiatu baita. Giuliano Simeone atera da haren ordez. Osasuna ondo egon da kokatuta zelaian, bloke ertainean. Atletico Madrili kostatu egin zaio zuloak topatzea. Lortu duen jokaldi apurretako batean, Julian Alvarezek erremate ona egin du, baina Herrerak ondo gelditu dio. Azken jokaldietan estutu egin du Atletico Madrilek, batez ere Giuliano Simenoek eman dion abiadurarekin. Baina gorritxoek ondo eutsi diote, eta lehen zatia hasi bezala amaitu da: 0-0. Almadaren gola Bigarren zati hasieran Osasunak pauso bat eman du atzera, eta lehen zatiaren hasieran gertatu bezala etxekoak nagusi izan dira. Baloiaren jabetza izan dute, eta Giuliano Simeonoren bidez saiatu dira min egiten, Bretonesen bizkarrera. Atletico Madril maiz iritsi da gorritxoen atera, eta beste behin Herrerak gelditu erabakigarria egin du. Marcos Llorenteren pase ona jaso du sakonean Julian Alvarez, eta area txikian egin duen errematea Herrerak atera du hanka luzatuta. Simeonek Sorloth zelairatu du, Griezmannen ordez. Novergiako aurrelariak aukera argia izan du buruz, baina kanpora joan zaio errematea. Osasunak ez zuen jokoaren kontrola, eta hori lortu asmoz Liscik Ruben Garcia kendu du, eta Moi Gomez atera du haren ordez. Gorritxoek aukera ona izan dute 66. minutuan, Iker Benitoren barneraketa on baten ostean. Haren erdiraketa Budimerrek errematatu du, baina baloiak Hanckori eman dio; baita ondoren Osasunak jokalariek egindako bi erremateek ere. Nahasia izan da jokaldia, baina ona aurretik jartzeko. Erreskadan gola sartu duena, ordea, etxeko taldea izan da. Giuliano Simenoek ondo gainditu du Bretones buruz buruko jokaldi batean,. eta atzera eman dio pasea Almadari. Hura indarrez iritsi da, gola sartu du, 70. minutuan. 20 minutu falta ziren neurketa amaitzeko, eta gola jasota, Osasunak aurrera egin behar zuen. Horretarako marrazkia aldatu du Liscik. Atzealdean lauko lerroarekin jokatzen hasi da, eta aurrean bi aurrelarirekin. Horretarako, Herrando eta Torro kendu ditu, Raul Garcia de Haro eta Kike Barjaren ordez. Atletico Madrilek, berriz, pauso bat eman du atzera. Osasunari utzi dio baloia, eta kontraerasoan saiatu da bigarren gola sartzen. Baina hortik amaiera bitarteko abagune argiena Liscik zuzentzen duen taldeak izan du, 89. minutuan. Moi Gomezek pase ona eman dio Budimirri. Kroaziako aurrelariak area ertzean egin du errematea, baina oraingo honetan Atletico Madrileko atezainak, Oblakek, atera du hanka, eta baloia atera dio. Epaileak hiru minutu baino ez du luzatu bigarren zatia, eta 1-0 amaitu da neurketa. Atletico Madril-Osasuna Atlético Madril: Oblak; Llorente, Le Normand, Gimenez, Hancko; Pablo Barrios, Koke (Gallagher, 55. min.), Álex Baena (Almada, 62. min.), Nico Gonzalez (Giuliano, 42. min.); Griezmann (Sorloth, 55. min.) eta Julian Alvarez (Raspadori, 82. min.). Osasuna: Sergio Herrera; Rosier (Iker Benito, 41. min.), Boyomo, Catena, Herrando (Raul Garcia de Haro. 75. min.), Bretones; Moncayola (Iker Muñoz, 85. min.), Torro (Kike Barja, 75. min.), Ruben García (Moi Gomez, 62. min.); Budimir eta Víctor Muñoz (Becker, 85. min.). Golak: 1-0: Almadak (69. min.)

Jada 50. urteurrenera gerturatzen ari da Lekeitioko (Bizkaia) Euskal Zine Bilera. Ostegunean eman zioten hasiera 48. aldiari, eta asteartean amaituko dute. Bada, hain zuzen, aurtengo festibala euskal zinema «saretzeko» parada gisa aurkeztu dute antolatzaileek. Nahiz eta oraindik egun batzuk gelditzen diren jaialdia amaitzeko, gaur bertan jakinarazi dituzte film laburren lehiaketako irabazleak, ostegunetik gaur arte izan baitira proiekzioak. Ikusgarri zineman egin dute ekitaldia. «Sari bat ematea ez da erraza. Are gutxiago euskal film laburrik onenak lehian direnean», hala azaldu dute antolatzaileek. Aurtengoan hogei film labur aukeratu dituzte lehiarako. Itziar Atienza aktoreak, Beñat Sarasola idazleak eta Miren Aperribai zuzendariak osatu dute epaimahaia. Filmik onenaren saria Eneko Muruzabalen Planetagatik lanari eman diote. Epaimahaiko kideen ustez, «film borobil eta jostaria» da Muruzabalena. Krisi ekologikoaren gaia umorez lantzeko gaitasuna goraipatu dute, besteak beste, bai eta Iñigo Aranburu eta Ainhoa Artetxe aktoreek egindako lana ere. Urrezko Antzara eta 3.000 euroko saria jaso ditu. Aitzol Saratxagak zuzendutako Ehiza film laburrarentzat izan da zuzendaritzarik onenaren saria. Saratxagak «dena lortzeko» izan duen «abilezia» nabarmendu dute epaimahaikideek. Mateo Txistu ipuin herrikoiaren prekuela bat egin du zuzendariak. «Elezahar bat kontatzeko birtuosismoa eta istorioak duen erritmo zaindua» izan dira aipatu dituzten arloetako batzuk. Bestalde, gidoirik onenaren saria Ana Ines Landetak eta Lorea Lyonsek sortutako Azkena proiektuarentzat izan da. Bederatzi minutu eskas irauten duen lan horretan, amatasunaren gaiari heldu nahi izan dio zuzendari bikoteak: ama izateko egon diren moduez, dauden moduez, eta ama ez izateko hautuaz aritu dira. Hain zuzen, gaiaren aukeraketa saritu dute: «Oso era originalean mahaigaineratzen du amatasunaren gaia. Emakumeen identitatean amatasunak utzi ditzakeen aztarnak erakusten ditu, abileziaz eta gordintasunez». Beste sari batzuk 2001ean edo aurretik jaiotako zuzendariei ematen zaie Benito Ansola saria. Aurten, Ekaitz Bertizi eman diote, Erreka zoko hortan lanagatik. Baztanen (Nafarroa) girotuta dago istorioa. Aita gaixotu ondoren, Joxepik pakete bat eraman beharko du Frantziako mugaraino, kontrabandoan. Misterioz bete du kontakizuna Bertizek. Epaimahaiak garrantzi berezia eman nahi izan dio filmeko argazkiari, baita planoen aukeraketari ere. Bestalde, memoria historikoa du ardatz Mikel Balerdi eta Deñe Garcia-Bravoren Eraman zutela-k. Martzelo Lasa eta Jesus Bujanda fusilatuak nork eta nola eraman zituen azaltzea izan da egileen helburua. Gaia zer-nolako sentsibilitatez landu duten jabetuta, epaimahaiak aipamen berezia egin nahi izan die, nahiz eta ez duten garaikurrik jaso. Epaimahaikideek uste dute memoria historikoa «modu tekniko, zehatz eta enpiriko batean» landuta dagoela. Gainera, EITB Ikusleen saria ere lortu du lanak, zinemara bertaratu direnen artean gustukoena izan baita. Batez beste, bost puntutik 4,58 lortu ditu. Horrez gain, urtero euskal zinemagintzako pertsona edo proiektu nabarmenak omentzen dituzte Euskal Zine Bileran. Aurten, Pantailak Euskaraz egitasmoari egin diote aitortza. Antolatzaileen esanetan, ekinaldi horretako kideek orain arte egindako lanari balioa eman nahi izan diote.

Laineza hartuta iritsi da Joanes Bakaikoa gaur Jokin Altunaren aurkako partidara, baina, pilotako klase aparta hartu, eta nafarrak burumakur egin du Eibarko Astelenatik etxerako bidea. Besteak beste, egun handietako erakustaldia eman baitu Altuna III.ak. Oso eraginkor aritu da ezker eskuarekin, eta, pilotalekuko ertz guztiak baliatuta, jokaldi ikusgarriak plazaratu ditu. Txapeldunak bazekien posible zela lehia gogorra izatea. Izan ere, Bakaikoak bi pilotari handi garaituak zituen aurrez: Iñaki Artola final-zortzirenetan, eta Javi Zabala final-laurdenetako lehen partidan. Hori jakinik, Aspeko pilotariak serio eta bizi jokatu du hasieratik, distiratsu aritu da errematean, eta, beste urte batez, erakutsi du txapela irabazteko hautagai nagusia dela. Lehia estua espero zen arren, Altunak aise hautsi du harri gogorra: Bakaikoa. Oso deigarria izan da bi pilotarietako inork tantorik ez egin izana sakez. Sakeari garrantzia kendu nahian, botea lau eta erdira atzeratu dute aurten antolatzaileek. Hori gutxi ez, eta pilotak ere ez dira hain biziak. Hori dela eta, sakez tanto gutxiago egiten dira partidetan, baina, era berean, sake-errematerako aukera handiagoak dituzte pilotariek. Eta arlo horretan maisuki jokatu du Altuna III.ak. Sake ia guztiak ezker horman sartu ditu, eta, Bakaikoak ongi erantzun arren, amezketarra distiratsu ibili da errematean izandako aukeretan. Batez ere airez aritu da ikusgarri, tantoak zabalean eta txokoan bukatuz. Guztira hemezortzi tanto egin ditu erasoan, eta horietatik hamar airez. Bakaikoak ez du ezertarako aukerarik izan defentsan. Dena den, Bakaikoak ondo hasi du partida, itxaropena izateko moduan. Ohi bezala, tantoak landu eta gogortu egin ditu, eta 0-2 eta 2-4 izan da aurretik. Biek azaldu dute fresko kantxaratu direla, eta nafarrak motibazioz gainezka ekin dio lehiari, lehen aldiz neurtu baititu indarrak Altuna III.aren aurka profesionaletan. Bazirudien lehen zatiak gogor joko zuela, baina partidaren gidoia ikusita, Aspekoak zera erabaki du: beste abiadura bat ezartzea kantxan. Sakea lortzearekin batera, gora egin du, eta ikuskizuna orduantxe hasi da. Amezketarrak sekulako jokaldiak egin ditu bata bestearen atzetik, eta, ohartzerako, 10-4 aurreratu da. Lehen atsedenaldi luzera 12-5 heldu dira. Betiko lez, Bakaikoak garesti saldu ditu tantoak, baina ezin izan du ezer egin aurkariaren inspirazioaren aurka. Atsedenalditik bueltan, txapeldunak bere bidean jarraitu du. Tentsioari bere horretan eutsi, eta ederki baliatu ditu kantxaren ertz guztiak. Bakaikoak bi bider berreskuratu du sakea, baina kale egin du bi aukeretan. Lehenengoan, falta egin du sakez. Eta, bigarrenean, hanka sartu du erasoko jokaldi batean. Bukaerarako, etsi egin du, eta Altuna III.ari txalo egin beste erremediorik ez du izan. Esaterako, amezketarrak zutik jarri ditu harmailetako zale guztiak 21-8koan. Kontrakantxatik bertatik ezkerrez jo behar izan du pilotakada bat, eta, paraleloki zabalera jota, tanto ikusgarria lortu du. Garailea pozik mintzatu da amaieran. «Eskuin eskuarekin gehiago kosta zait min egitea, baina ezkerrez oso ongi aritu naiz. Espero nuen lehia gogorragoa izango nuela, baina nire bertsiorik onenetakoa kantxaratu ahal izan dut». Joan den astetik, jauzi bat egin du gora txapeldunak. «Gero eta hobeto sumatzen dut neure burua, eta espero dut bide berean segitzea txapelketa amaitu bitarte». Bakaikoak arazo gabe onartu du porrota. «Telebistaz eta zuzenean ikusia nuen nolako pilotaria zen Altuna III.a, baina gaur bertatik bertara ikusi dut. Ikaragarria da nola jokatzen duen». Peña II.a eta Zabala, bihar Hain zuzen, Altuna III.a jada sailkatuta dago finalerdietarako. Multzo berean, Jon Ander Peña eta Zabala lehiatuko dira bihar, Tolosako Beotibarren (Gipuzkoa). Peña II.ak irabazten badu, Altuna III.a finalerdietan izango da, eta bigarren postua Peña II.a eta Bakaikoaren artean jokatuko dute, datorren asteburuan. Beste multzoan, airean dago dena azken jardunaldiari begira. Joseba Ezkurdia finalerdietan izango da, atzo 22-9 irabazi baitzion Erik Jakari. Sailkatzea bere esku du Peio Etxeberriak, atzo 22-7 irabazi baitzion Iker Larrazabali. Hori bai, sailkatu nahi badu, Ezkurdia menderatu beharko du datorren astean.

Euskal mendizaletasunaren urteko ekitaldi handiak Euskal Herriko mendizale komunitatea bildu du ostiral honetan Donostiako Aldapeta Maria Ikastetxeko auditoriumean. Aurten Club Vasco de Camping elkarteak antolatu du gala, taldearen 75. urteurreneko ekitaldien artean. Thierry Biscary abeslariaren emanaldiarekin hasi zen ekitaldia, eta, ondoren, elkarte antolatzaile eta federazioetako ordezkariek beren hitzaldiak egin zituzten. Club Vasco de Camping elkartearen izenean, Juan Carlos Sanz presidenteak hartu zuen hitza; Euskal Mendizale Federazioaren izenean, Ricardo Hernani presidenteak hitz egin zuen, eta Eusko Jaurlaritzaren izenean, Gorka Iturriaga Kirol zuzendariak mezu bat helarazi zuen. Mendizaletasunaren oinarrian dagoen lan kolektiboaren eta borondatezko konpromisoaren balioa azpimarratu zuten hirurek, gaur egun 41.000 federatu baino gehiago biltzen baititu mendizale komunitateak. Juan Carlos Sanzek Vasco de Camping elkartearen 75 urtean egindako bidea azpimarratu zuen: «Taldeak, gaur egun, 4.000tik gora bazkide ditu, eta dinamismo handia atal guztietan. Gainera, logoa eta marka berritu ditugu, irizpide berriak zehaztu ditugu garaiarekin bat etorriz, etorkizunera begiratzeko». Ricardo Hernani EMFko presidenteak gogorarazi zuen mendizaletasunak zer erronka nagusi dituen: «Mendi talde eta elkarteetan belaunaldi erreleboa bermatzea, ingurumenarekiko errespetuaren balio tradizionalei eustea, haize parkeek sortutako kezkei buruz eta mendiko kontsumo ohitura berriek izan dezaketen eraginari buruz hausnartzea… Betiko balio berberekin jarraitu behar dugu, horien bidez iritsi baikara gaur egun gauden tokira eta garena izatera». Gorka Iturriagak, bertaratu ezin izan ez bazen ere, mendiaz gozatzen jarraitzeko gonbita eta mezua helarazi zien galan bildutakoei: «Jarrai ezazue mendizaletasunarekiko maitasuna elikatzen, ospa ezazue une bakoitza, eta zabal ezazue gure pasioa mundu osoan. Gogoratu beti zer dion zuen goiburuak: betidanik betiko». EMFren 2025 sariak Ohiko hitzaldien ondoren, Euskal Mendizale Federazioaren urteko sariak banatu zituzten. Urte osoan federazio eremuan egindako lanagatik, ibilbideagatik edo mendian eginiko jarduerengatik nabarmendu diren hainbat laguni aitortza egin zitzaien sari horien bidez. Euskal Mendizaletasunaren Lagunak EMF saria Soraluze Elorza familiak eta Alex Txikon alpinistak sortutako Mendietxe elkartearentzat izan da, «Azpeitiko Mendietxe mendiko museoa bultzatzen eginiko lanagatik, eta Emmoa fundazioarekin etorkizunean izango duen lankidetzagatik», EMFko buruek nabarmendu zutenez. Ibilbidearen EMF saria Jose Maria Pradera Gurrutxaga eta Juan Luis Arriola Loiola mendizale beteranoentzat izan da, «mendi elkarteetan eta mendiko kulturaren sustapenean egindako bizitza osoko lanagatik». Pradera 15 urterekin sartu zen Barakaldoko Arroletza mendi taldean, eta Bizkaiko Mendizale Federazioko lehen presidentea ere izan zen. Arriolak, berriz, Arabako mendizaletasunari eman dio bizitza osoa, eta, besteak beste, ibilbideak diseinatu eta inguruko gidaliburuak idatzi ditu. Loli Lopez Goñi Emakume Mendizaleak saria Arantza Lazurtegi mendizaleak jaso du, «emakumeen mendizaletasunean erakutsitako adibide eta lidergoagatik». Lazurtegik bi mila gailur baino gehiago igo ditu, horien artean ehun mendien katalogoko 920 tontor. Mendi lehiaketa eta txapelketa askotan parte hartzeaz gain, Sopelako Munarrikolanda mendi taldeko lehendakaria ere bada. Jarduera Interesgarrienaren Antxon Bandres EMF saria Eli Azurmendi, Rafa Elorza eta Juan Carlos Sanzek bultzatutako Harri, orri, arkatz: krokisaren artea eskaladan proiektuak jaso du, «eskaladako krokisaren balio artistiko eta dokumentala aldarrikatzeagatik». Hasiera batean erakusketa soil bat izan behar zuena handituz eta zabalduz joan da —hainbat herritan izan da ikusgai, arrakasta handiz—; liburu bihurtu zen gero —bigarren edizioa kalean da dagoeneko—, eta aurki egitasmoari buruzko dokumentala estreinatuko da Bilboko Mendi Film jaialdian. Joseba Iztueta alpinistak (eskuinean) jaso du ‘Andres Espinosa’ sari nagusia, Ricardo Hernani EMFko presidentearen eskutik. EMF Sari nagusia, Andres Espinosa EMF saria, Joseba Iztueta alpinistarentzat izan da (Gabiria, Gipuzkoa, 1991), «bere ibilbide luzeagatik, espiritu esploratzaileagatik eta mendiari eskainitako dedikazioagatik, betiere mendia abentura eta aurkikuntza eremutzat hartuta». Besteak beste, Pirinioetan, Alpeetan, Kirgizistanen, Tajikistanen, Indian, Marokon eta Baltistanen ibili da Iztueta, eta BERRIAren mendiko orriotan, hainbatetan agertu dira hark eta lagunek eginiko jarduerak: besteak beste, Lenin Peak eta Khan Tengri igo zituenekoa; Ibon Mendiak eta biek Marokoko Talembote mendialdean zabaldutako bideak; Ladakhen (Indiako Himalaia), Amaiur Peak eta beste hainbat bide zabaldu zituztenekoa; edo berriki, Karakorumeko Khane haranean eginiko jarduerak. «Haren ibilbideak Andres Espinosa aitzindariarena oroitarazten du», nabarmendu zuten EMFko arduradunek saria emateko orduan. Pyrenaica sariak Urtero bezala, Euskal Mendizale Federazioaren aldizkariak, Pyrenaica-k, azken urtean argitaratutako artikulurik eta argazkirik onenak saritu zituen. Pyrenaica 42. Argazki Lehiaketan, lehen saria Juan Jose Lopez Azurmendirentzat izan da Llegando a Concordia lanagatik (Concordiara iristen), eta bigarren saria Antxon Gorrotxategirentzat izan da Lyskamm lanagatik. Pyrenaica 41. Artikulu Lehiaketan, berriz, Josu Granjarentzat izan da lehen saria La sima Leunbe y el Maelstrom vasco lanarekin (Leunbeko sima eta euskal Maelstrom-a); bigarren saria Kattalin de Pedro eta Iñigo Unanueren Zikloalpinismoa Bolivian artikuluarentzat izan da, eta hirugarrena Mikel Arrizabalaga BERRIAko mendi ibilbideen ataleko kolaboratzailearentzat Tashi Delek lanagatik. Azkenik, Pyrenaica Blogaren IX. Saria Ainhoa Lendinezentzat izan da, Ama Dablan argitalpenagatik. CVCEPHOTO 2025 sariak Azkenik, CVCEPHOTO lehiaketaren hamaikagarren ekitaldiko sariak banatu ziren. Club Vasco de Camping elkarteak antolatzen du nazioarteko lehiaketa entzutetsu hori, eta aurten 38 herrialdetako 144 argazkilarik parte hartu dute. Rainer Eder argazkilari suitzarraren Michelangelo irudiak irabazi du lehiaketa. Sari nagusiez gain, urtero hainbat sari berezi ere izaten dira lehiaketan. Euskal Herriko Argazkirik Onenaren EITB Sari Berezia Aritz Gordorentzat izan da aurten, Neguko oreka lanagatik. Bilboko Mendi Film zinemaldiaren urteko kartela ere lehiaketa honetatik sortzen da. Aurten, sari berezi hori Julia Roger Veyerrentzat izan da, The Cave (Haitzuloa) lanagatik. Ekitaldia amaitzeko, sari guztien irabazleek talde argazkia atera zuten, eta iragarri zuten hurrengo gala Arrigorriagan (Bizkaia) izango dela, Padura mendi taldeak antolatuta, 2026an 75. urteurrena ospatuko baitu elkarte horrek.

Errusiak eta Ukrainak elkarren arteko gatazka amaitu nahi dutela uste du Donald Trump AEB Ameriketako Estatu Batuetako presidenteak: «Orain, amaitu egin behar dugu». Vladimir Putin Errusiako presidentearekin telefonoz hitz egin eta harekin biltzekoa dela iragarri eta biharamunean Volodimir Zelenski Ukrainako presidentearekin bildu da, Etxe Zurian. Bi aldeek gerra amaitu nahi dutela iruditzen zaiola adierazi du Trumpek; horregatik, Kievi Tomahawk irismen luzeko misilak eman gabe gerra amaitzeko esperantza duela nabarmendu du. Washingtonek Ukrainari ematen dion laguntza militarra areagotzeaz hitz egitekoak ziren bi liderrak, are, Trumpek berak azken asteetan hainbatetan iradoki bezala, Tomahawk misil batzuk entregatzeaz. Gaur, baina, ez du halakorik ziurtatu. Ukrainako presidenteak, ostera, Putinek ez duela bakerik nahi berretsi du, eta gogorarazi Kievek «segurtasun bermeen» beharra duela: «NATO [Ipar Atlantikoko Itunaren Erakundea] da segurtasun berme onena, baina armak ere garrantzitsuak dira. Baita aliatuak edukitzea ere». Bilkuraren aurretik egindako agerraldian, kazetari batek zein kontzesio egiteko prest dagoen galdetu dionean hitz egin du Zelenskik segurtasun bermeez; eta gehitu du lehenik «eseri eta hitz egin» behar dela, eta bigarren urratsa su eten bat lortzea dela. Hitza hartu bezain laster, Zelenskik Trump zoriondu du Gazarako ondutako plana dela-eta: «Egin duzu». Eta jarraian adierazi du «orain» Ukrainako inbasioa geldiarazteko «unea» dela. Bi liderrak «elkar ulertzen» hasi direla ere gaineratu du. Eta eskerrak eman dizkio behin eta berriro Etxe Zuriko maizterrari. Joan den urtarrilean AEBetako presidente kargura itzuli zenetik, Trumpek eta Zelenskik Washingtonen egindako hirugarren bilera izan da. Aurrenekoan, otsailean, Trumpek jendaurrean egin zion errieta Zelenskiri, eta aurpegiratu zion, gutxi-asko, AEBen laguntza militarrik gabe zereginik ez zuela guda zelaian, eta planteatu zion, hortaz, Putinek gatazka amaitzeko jartzen dituen baldintzak onartzeko; besteak beste, Ukrainak bere lurralde batasunari uko egitea. Gaurko agerraldiak ez du zerikusirik izan horrekin, eta Trumpek izkin egin du kazetariek galdetu diotenean ea Ukrainak lurraldeak eman beharko dizkion Errusiari: «Ezin da jakin geran batean zer gertatuko den». Horren harira ere, AEBetako presidenteak jarrera aldakorra izan du. Abuztuan batzartu zen bigarrenez Zelenskirekin, baina jarrera aldaketa irailean iritsi zen. NBE Nazio Batuen Erakundearen Batzar Nagusiaren urteroko bilkuran elkartu ziren bi agintariak, New Yorken (AEB). Ordura arte, lurralde trukerik egin ezean, Trumpek ezinezkotzat jo izan zuen gatazka amaitzea. NBEren batzarrean izandako elkarrizketa labur haren ostean, baina, Etxe Zuriko maizterrak ziurtatu zuen Ukrainak galdutako lurraldeak berreskuratzeko aukera izan zezakeela. 2022ko otsailean inbasioa hasiz geroztik, Luhansk, Donetsk, Kherson eta Zaporizhiako eskualdeak okupatu ditu Errusiak. Gaur lurralde trukeen inguruan hitz egin ez badu ere, Trump oso baikor agertu da gerra amaitzeko aukerez: «oso-oso gertu gaude». Eta, bide batez, Ukrainari Tomahawk misilak bidaltzeko aukerak lausotu ditu. AEBek Ukrainari eman diezazkioketen misil horiei dagokienez, Moskuk uste du horien erabilerak ez duela gerraren egoera aldatuko; iruditzen zaio, ordea, AEBen eta Errusiaren arteko harremanari «kalte» egingo liokeela. Hori adierazi zuen atzo Yuri Uxakov Putinen aholkulariak, prentsaurreko batean. Trumpek berak jarri du mahai gainean 2.400 kilometro inguruko irismena duten misilak Ukrainari emateko aukera. Tomahawk misilez hitz egitekoak zirela aipatu dute bi agintariek, baina AEBetako presidenteak gogorarazi du Washingtonek ere behar dituela arma horiek. Eta «horregatik ere» gerra amaitzea garrantzitsua dela. Hainbat adituk azken egunetan hedabideetan nabarmendu dutenez, AEBek uneotan 25-50 dituztelako erabilgarri, ez gehiago. Horren harira, Trumpek berak aitortu zuen atzo ez dituztela «erreserbak» agortu nahi. Etxe Zuriko maizterraren esanetan, Putinek ez zuen ondo hartu Tomahawkak Ukrainari entregatzeko aukera. Nolanahi ere, azpimarratu zuen «emankorra» izan zela Errusiako presidentearekin izandako bilera. Misil horien bidez, Ukrainak helburu luke Errusiaren armategiak eta energia azpiegiturak jotzea. Paraleloki, Zelenski atzo Washingtonen bildu zen armak ekoizten dituzten AEBetako bi enpresarekin: Raytheonekin eta Lockheed Martinekin. «Aireko defentsa sistemen eta irismen luzeko misilen gure gaitasuna indartzeaz hitz egin dugu», esan zuen Zelenskik, sare sozialetan. 2022ko otsailean Errusiak Ukrainako inbasioa hasi zuenetik, Zelenski laguntza eskatzen ari zaie bai AEBei, bai Mendebaldeko beste potentzia militar batzuei. Hasieran, erasorako tankeak izan ziren; gero, F-16 gerra hegazkinak; eta orain irismen luzeko misilak. Esan izan du horien bidez gerraren norabidea alda zezakeela Ukrainak, baina 2022ko udazkenaren hasieran ekialdean egin zuen kontraerasoaz geroztik —neurri handi batean, Errusia hegoalderago zeuzkan posizioak indartzen ari zelako—, Ukrainak nekez berreskuratu du lur eremurik; kontrara, Institute for the Study of War AEBetako think tank-ak ia egunero berritzen duen informazioa aintzat hartuta, Errusiak segitzen du fronteko lerroan aurrerantz egiten, oso-oso pixkanaka bada ere. Putinekin, Budapesten Bien bitartean, Viktor Orban Hungariako ministroa pozik dago Putin eta Trumpen arteko bilkura Budapesten egitekoak direlako. «Bakearen ikuspegia eta alderdi teknikoa kontuan hartuta leku seguru baten bila ari baldin baziren, Budapesten aldeko hautua logikoa da», esan du, irrati kate publikoan egin dioten elkarrizketa batean. «Laster», datozen asteetan, egingo dutela bilkura hori iragarri zuen atzo Trumpek.

Senitartekoek eman dute Jone Forcadaren (1933-2025) heriotzaren berri, gaur eguerdian. Andereñoa izandakoa, euskaltzalea eta hainbat kausaren aldeko militantea zen Forcada, eta bere erabakiz eman du gaur azken arnasa, eutanasia protokoloa aplikatu baitiote, berak hala eskatuta. Errenteria eta Donostia artean handitu zen Forcada. Irakasle ikasketak egin, eta ikastolen sorreran ibili zen, Elbira Zipitria andereño ezagunaren kide zela. Donostiako Kaiko Ikastolan aritu zen irakasten, eta garai hartan ezagutu zuen gerora senarra izango zuena, Jose Luis Alvarez Txillardegi. Txillardegi, Euskadi Ta Askatasuna erakundearen sortzaileetakoa izanik, erbesteratu egin zen 1961ean, eta, hilabete batzuk geroago, baita haren familia ere. Forcadak eta Txillardegik hamasei urte igaro zituzten erbestean, jardun politikoari eta familia guztiari batera eusten. Parisen egon ziren aurrena, eta han jaio zen bikotearen laugarren semea. Lapurdin ere igaro zuten bolada bat, eta gero, Belgikan egin zituzten urte batzuk. Euskal Herrira ahalik eta gehien hurbildu nahian, Forcada Bordelen ere aritu zen euskara irakasten, harik eta Frantziak Ipar Euskal Herrira etortzeko baimena eman zion arte. Hendaian egon zen sei urtez, eta, tarte horretan, Iparraldeko bigarren ikastola izan zena irekitzen lagundu zuen. Franco hil ostean, familia Donostiara itzuli zen, eta irakaskuntzan jardun zuen Forcadak, Añorgako (Donostia) ijitoen eskolan. Euskararen militantea Neurri batean itzalean, Forcadak hainbat herri mugimendutan egin du ekarpena: euskal presoen eskubideen alde, migratzaileen alde… Ekarpen nabarmenetakoa euskararen alde egindakoa izan zen: ikastolen sorreran, euskarazko irakaskuntzan. Euskal Herrian Euskaraz-en sortzaileetakoa ere izan zen, eta Donostia Bagera euskaltzaleen elkarteko partaidea. Azken urteetan, senitartekoen arabera, heriotza duinaren aldeko borrokan aritu nahi izan zuen. Forcadak berak eskatuta, ez da beilarik ez eta hileta elizkizunik ere egingo, eta lurperatzea familiartean izango da.

Hamazazpi hilabeteren ondoren, amore eman behar izan du BBVAk. Hamazazpi hilabete iraun du Sabadell erosteko eskaerak, eta atzo azken orduan ezagutzera eman zuenez, akziodunen %25,5ek baino ez du onartu proposamena. Gutxienez partaidetzaren erdia eskuratzea behar zuenez, bankuak atzera egitea erabaki du. Hala jakinarazi zion CNMV Balore Merkatuen Espainiako Batzordeari. Ez da Sabadell bereganatzen ahalegindu den lehen aldia. 2020an, bat egiteko aukera negoziatu zuten, baina Sabadell bankuko administrazio kontseiluak atzera egin zuen. Iaz berriz saiatu zen, eta akzioko 4,83 euro eskaini zituen BBVAk. Une hartako tituluen kotizazioa baino %30 gehiago eskaini zuen, baina zergak ordaintzea saihesteko akzio trukaketak eskaini ditu gerora. Duela hilabete, kasurako, eskaintza hobetu zuen, eta Kataluniako 4,8 akzioren truke BBVAren bat eskaini zuen, aurretik proposatutakoa %10 hobetuz. Sabadellgo kontseiluak, berriz, gogor egin du kontra, eta pultsuari eutsi dio. Duela hilabete inguru, aurreratu zuen BBVAren eskaintzak ez zuela arrakasta handirik izan. Bere akziodunak erakartzeko dibidendu handia banatu du aurten. Horretarako, uztailean Erresuma Batuko negozio adarra saldu zuen, eta hortik bereganatutako dirua akziodunen mesedetan baliatu du, hein handi batean. Bihar ostiralean emango du bere emaitzen berri BBVAk. Behin operazioak porrot eginda, jakinarazi du bere akziodunak saritzeko asmoak «azkartuko» dituela eta 2028ra arte 36.000 milioi euro banatuko dituela. Horren heren bat, 13.000 milioi euro, aurki banatuko ditu. Akzioak berrerosteko operazioen eta dibidenduen bidez egingo du banaketa hori. Zehazki, 1.000 milioi euro urriaren 31n berrerosiko ditu, eta azaro hasieran beste 1.800 milioi banatuko ditu dibidenduen bidez. Gainera, arriskupean egon daitezkeen aktiboen %12 estaltzeko gehiegizko kapitala duenez, koltxoi hori akziodunak saritzeko baliatu nahi du, eta «akzioak berrerosteko plan anbiziotsu bat» abiaraziko du aurki. Europako Banku Zentralaren onespenaren zain dago horretarako.